ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 13 ਜੂਨ ਤੋਂ ਫਰਾਂਸ ਦੇ ਦੌਰੇ 'ਤੇ; ਇਨੋਵੇਸ਼ਨ, ਜੀ-7 ਅਤੇ ਤਕਨਾਲੋਜੀ ਸਮੇਤ ਕਈ ਅਹਿਮ ਸਮਾਗਮਾਂ 'ਚ ਲੈਣਗੇ ਹਿੱਸਾ

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 13 ਤੋਂ 18 ਜੂਨ ਤੱਕ ਫਰਾਂਸ ਦੇ ਇੱਕ ਬੇਹੱਦ ਅਹਿਮ ਸਰਕਾਰੀ ਦੌਰੇ 'ਤੇ ਰਹਿਣਗੇ। ਤੈਅ ਪ੍ਰੋਗਰਾਮ ਮੁਤਾਬਕ, ਉਹ 13-14 ਜੂਨ 2026 ਨੂੰ ਨੀਸ (Nice) ਜਾਣਗੇ, ਇਸ ਤੋਂ ਬਾਅਦ 16-17 ਜੂਨ ਨੂੰ ਐਵੀਅਨ (Evian) ਅਤੇ 17-18 ਜੂਨ 2026 ਨੂੰ ਪੇਰਿਸ ਦਾ ਦੌਰਾ ਕਰਨਗੇ। ਸਾਲ 2014 ਤੋਂ ਬਾਅਦ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਇਹ 7ਵਾਂ ਅਧਿਕਾਰਤ ਫਰਾਂਸ ਦੌਰਾ ਹੋਵੇਗਾ। ਇਸ ਤੋਂ ਪਹਿਲਾਂ ਫਰਾਂਸ ਦੇ ਰਾਸ਼ਟਰਪਤੀ ਨੇ 17-19 ਫਰਵਰੀ ਦੇ ਵਿਚਕਾਰ ਭਾਰਤ ਦਾ ਦੌਰਾ ਕੀਤਾ ਸੀ, ਜਿਸ ਦੌਰਾਨ ਦੋਵਾਂ ਦੇਸ਼ਾਂ ਦੇ ਸਬੰਧਾਂ ਨੂੰ 'ਸਪੈਸ਼ਲ ਗਲੋਬਲ ਸਟ੍ਰੈਟੇਜਿਕ ਪਾਰਟਨਰਸ਼ਿਪ' (ਵਿਸ਼ੇਸ਼ ਗਲੋਬਲ ਰਣਨੀਤਕ ਭਾਈਵਾਲੀ) ਤੱਕ ਵਧਾਇਆ ਗਿਆ ਸੀ।

ਇਹ ਦੌਰਾ ਭਾਰਤ ਅਤੇ ਫਰਾਂਸ ਵਿਚਾਲੇ ਉੱਚ ਪੱਧਰੀ ਗੱਲਬਾਤ ਦੀ ਰਫ਼ਤਾਰ ਨੂੰ ਦਰਸਾਉਂਦਾ ਹੈ। ਇਸ ਦਾ ਮੁੱਖ ਮਕਸਦ ਇਨੋਵੇਸ਼ਨ (ਨਵੀਨਤਾ), ਵਿਗਿਆਨ ਅਤੇ ਤਕਨਾਲੋਜੀ, ਆਰਥਿਕਤਾ, ਸੱਭਿਆਚਾਰ ਅਤੇ ਦੋਵਾਂ ਦੇਸ਼ਾਂ ਦੇ ਲੋਕਾਂ ਵਿਚਾਲੇ ਆਪਸੀ ਸਬੰਧਾਂ ਨੂੰ ਹੋਰ ਮਜ਼ਬੂਤ ਕਰਨਾ ਹੈ।

ਨੀਸ ਸ਼ਹਿਰ ਵਿੱਚ ਪੀ.ਐਮ. ਮੋਦੀ ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੂਅਲ ਮੈਕਰੋਨ ਨਾਲ ਮਿਲ ਕੇ 'ਭਾਰਤ ਇਨੋਵੇਟਸ' (Bharat Innovates) ਈਵੈਂਟ ਦਾ ਉਦਘਾਟਨ ਕਰਨਗੇ। ਇਹ ਸਮਾਗਮ ਭਾਰਤ, ਫਰਾਂਸ ਅਤੇ ਦੁਨੀਆ ਦੇ ਚੋਟੀ ਦੇ ਇਨੋਵੇਸ਼ਨ ਸਟਾਰਟਅੱਪਸ ਨੂੰ ਇੱਕ ਮੰਚ 'ਤੇ ਲਿਆਉਂਦਾ ਹੈ। 'ਇੰਡੀਆ-ਫਰਾਂਸ ਈਅਰ ਆਫ ਇਨੋਵੇਸ਼ਨ' ਦੇ ਤਹਿਤ ਹੋ ਰਹੇ ਇਸ ਈਵੈਂਟ ਨਾਲ ਦੋਵਾਂ ਦੇਸ਼ਾਂ ਵਿਚਾਲੇ ਤਕਨੀਕੀ ਸਾਂਝੇਦਾਰੀ ਵਧੇਗੀ। ਇਸ ਵਿੱਚ 120 ਤੋਂ ਵੱਧ ਭਾਰਤੀ ਕੰਪਨੀਆਂ/ਸਟਾਰਟਅੱਪਸ ਅਤੇ ਫਰਾਂਸ ਸਮੇਤ ਹੋਰਨਾਂ ਦੇਸ਼ਾਂ ਦੇ ਨਾਮਵਰ ਕਾਰੋਬਾਰੀ ਆਗੂ, ਨਿਵੇਸ਼ਕ ਅਤੇ ਸੀ.ਈ.ਓ. ਹਿੱਸਾ ਲੈਣਗੇ।

ਨੀਸ ਵਿਖੇ ਹੀ ਪ੍ਰਧਾਨ ਮੰਤਰੀ ਮੋਦੀ ਅਤੇ ਰਾਸ਼ਟਰਪਤੀ ਮੈਕਰੋਨ ਵਿਚਾਲੇ ਪਹਿਲੀ ਦੁਵੱਲੀ ਸਿਖਰ ਵਾਰਤਾ (Bilateral Summit) ਹੋਵੇਗੀ। ਇਸ ਤੋਂ ਬਾਅਦ, 16-17 ਜੂਨ ਨੂੰ ਪੀ.ਐਮ. ਮੋਦੀ ਫਰਾਂਸ ਦੇ ਐਵੀਅਨ ਸ਼ਹਿਰ ਵਿੱਚ ਹੋਣ ਵਾਲੀ ਜੀ-7 (G-7) ਸਿਖਰ ਸੰਮੇਲਨ ਵਿੱਚ ਹਿੱਸਾ ਲੈਣਗੇ, ਜਿਸ ਲਈ ਰਾਸ਼ਟਰਪਤੀ ਮੈਕਰੋਨ ਨੇ ਉਨ੍ਹਾਂ ਨੂੰ ਵਿਸ਼ੇਸ਼ ਸੱਦਾ ਦਿੱਤਾ ਹੈ। ਜੀ-7 ਵਿੱਚ ਭਾਰਤ ਦੀ ਮੌਜੂਦਗੀ ਗਲੋਬਲ ਸਾਊਥ (Global South) ਦੀ ਇੱਕ ਪ੍ਰਮੁੱਖ ਆਵਾਜ਼ ਅਤੇ ਵਿਸ਼ਵਵਿਆਪੀ ਚੁਣੌਤੀਆਂ ਨਾਲ ਨਜਿੱਠਣ ਵਿੱਚ ਇੱਕ ਅਹਿਮ ਭਾਈਵਾਲ ਵਜੋਂ ਭਾਰਤ ਦੇ ਵਧਦੇ ਕੱਦ ਨੂੰ ਦਰਸਾਉਂਦੀ ਹੈ।

ਪ੍ਰਧਾਨ ਮੰਤਰੀ 18 ਜੂਨ 2026 ਨੂੰ ਪੇਰਿਸ ਜਾਣਗੇ ਅਤੇ ਰਾਸ਼ਟਰਪਤੀ ਮੈਕਰੋਨ ਦੇ ਨਾਲ ਯੂਰਪ ਦੇ ਸਭ ਤੋਂ ਵੱਡੇ ਤਕਨਾਲੋਜੀ ਅਤੇ ਸਟਾਰਟਅੱਪ ਈਵੈਂਟ, 'ਵੀਵਾਟੈਕ ਸਮਿਟ' (VivaTech Summit) ਵਿੱਚ ਸ਼ਾਮਲ ਹੋਣਗੇ। ਇਸ ਸਮਿਟ ਵਿੱਚ ਇੱਕ ਭਾਰਤੀ ਪਵੇਲੀਅਨ ਹੋਵੇਗਾ, ਜੋ ਇਸ ਸਾਲ ਦਾ ਸਭ ਤੋਂ ਵੱਡਾ ਪਵੇਲੀਅਨ ਹੋਣ ਜਾ ਰਿਹਾ ਹੈ। 'ਭਾਰਤ ਇਨੋਵੇਟਸ' ਅਤੇ 'ਵੀਵਾਟੈਕ ਸਮਿਟ' ਦੋਵਾਂ ਵਿੱਚ ਪੀ.ਐਮ. ਮੋਦੀ ਦੀ ਸ਼ਮੂਲੀਅਤ ਭਾਰਤ ਨੂੰ ਇਨੋਵੇਸ਼ਨ, ਡਿਜੀਟਲ ਤਬਦੀਲੀ ਅਤੇ ਉੱਦਮਤਾ (Entrepreneurship) ਲਈ ਇੱਕ ਗਲੋਬਲ ਹਬ ਵਜੋਂ ਪੇਸ਼ ਕਰੇਗੀ।

ਇਹ ਦੌਰਾ ਭਾਰਤ-ਫਰਾਂਸ ਰਣਨੀਤਕ ਭਾਈਵਾਲੀ ਅਤੇ ਭਾਰਤ-ਯੂਰਪੀਅਨ ਯੂਨੀਅਨ (EU) ਦੇ ਸਬੰਧਾਂ ਨੂੰ ਹੋਰ ਪੀਢਾ ਕਰਨ, ਦੁਵੱਲੇ ਸਹਿਯੋਗ ਦੀ ਸਮੀਖਿਆ ਕਰਨ ਅਤੇ ਅੰਤਰਰਾਸ਼ਟਰੀ ਮੁੱਦਿਆਂ 'ਤੇ ਵਿਚਾਰਾਂ ਦਾ ਅਦਾਨ-ਪ੍ਰਦਾਨ ਕਰਨ ਦਾ ਇੱਕ ਵਧੀਆ ਮੌਕਾ ਹੋਵੇਗਾ। ਭਾਰਤ ਅਤੇ ਫਰਾਂਸ ਨੇ 1947 ਵਿੱਚ ਭਾਰਤ ਦੀ ਆਜ਼ਾਦੀ ਤੋਂ ਤੁਰੰਤ ਬਾਅਦ ਡਿਪਲੋਮੈਟਿਕ (ਸਫ਼ਾਰਤੀ) ਸਬੰਧ ਸਥਾਪਤ ਕੀਤੇ ਸਨ। 26 ਜਨਵਰੀ 1998 ਨੂੰ ਸ਼ੁਰੂ ਹੋਈ ਇਹ ਰਣਨੀਤਕ ਸਾਂਝੇਦਾਰੀ 25 ਸਾਲ ਤੋਂ ਵੱਧ ਪੁਰਾਣੀ ਹੈ। ਇਹ ਭਾਰਤ ਲਈ ਕਿਸੇ ਪੱਛਮੀ ਦੇਸ਼ ਨਾਲ ਅਤੇ ਫਰਾਂਸ ਲਈ ਕਿਸੇ ਗ਼ੈਰ-ਪੱਛਮੀ ਦੇਸ਼ ਨਾਲ ਪਹਿਲੀ ਰਣਨੀਤਕ ਸਾਂਝੇਦਾਰੀ ਸੀ।

ਇਹ ਦੌਰਾ ਉੱਚ ਪੱਧਰੀ ਸਿਆਸੀ ਗੱਲਬਾਤ ਨੂੰ ਅੱਗੇ ਵਧਾਏਗਾ ਅਤੇ ਵਿਗਿਆਨ, ਤਕਨਾਲੋਜੀ ਤੇ ਆਰਥਿਕ ਸਹਿਯੋਗ ਦੇ ਖੇਤਰ ਵਿੱਚ ਨਵੇਂ ਰਾਹ ਖੋਲ੍ਹੇਗਾ। ਮੌਜੂਦਾ ਗਲੋਬਲ ਹਾਲਾਤ ਵਿੱਚ ਇਹ ਦੌਰਾ ਯੂਰਪ ਅਤੇ ਈ.ਯੂ. ਨਾਲ ਸਹਿਯੋਗ ਵਧਾਉਣ ਦੇ ਭਾਰਤ ਦੇ ਵਿਜ਼ਨ ਦੇ ਅਨੁਕੂਲ ਹੈ, ਜਿਸ ਨਾਲ ਦੇਸ਼ ਦੀ ਆਰਥਿਕ ਅਤੇ ਸੁਰੱਖਿਆ ਸਮਰੱਥਾ (National Capacity) ਹੋਰ ਮਜ਼ਬੂਤ ਹੋਵੇਗੀ।