ਤਾਜਾ ਖਬਰਾਂ
ਚੰਡੀਗੜ, 7 ਜੂਨ- ਸ਼੍ਰੋਮਣੀ ਅਕਾਲੀ ਦਲ ਦੀ ਸੰਗਠਨਕ ਪੁਨਰਸੁਰਜੀਤੀ ਅਤੇ ਭਵਿੱਖੀ ਚੋਣੀ ਚੋਣ ਪ੍ਰਕਿਰਿਆ ਨੂੰ ਸੁਚਾਰੂ ਤਰੀਕੇ ਨਾਲ ਅੱਗੇ ਵਧਾਉਣ ਲਈ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋਂ ਬਣਾਈ ਗਈ ਭਰਤੀ ਕਮੇਟੀ ਵੱਲੋਂ ਇੱਕ ਹੋਰ ਮਹੱਤਵਪੂਰਨ ਕਦਮ ਚੁੱਕਿਆ ਗਿਆ ਹੈ। ਕਮੇਟੀ ਦੇ ਮੈਂਬਰਾਂ ਮਨਪ੍ਰੀਤ ਸਿੰਘ ਇਯਾਲੀ, ਜੱਥੇਦਾਰ ਗੁਰਪ੍ਰਤਾਪ ਸਿੰਘ ਵਡਾਲਾ, ਜੱਥੇਦਾਰ ਇਕਬਾਲ ਸਿੰਘ ਝੂੰਦਾਂ, ਜੱਥੇਦਾਰ ਸੰਤਾ ਸਿੰਘ ਉਮੈਦਪੁਰੀ ਅਤੇ ਬੀਬੀ ਸਤਵੰਤ ਕੌਰ ਦੀ ਅਗਵਾਈ ਹੇਠ 10 ਜੂਨ (ਮੰਗਲਵਾਰ) ਨੂੰ ਸਵੇਰੇ 11 ਵਜੇ ਚੰਡੀਗੜ ਸੈਕਟਰ 30 ਸਥਿਤ ਬਾਬਾ ਮੱਖਣ ਸ਼ਾਹ ਲੁਬਾਣਾ ਭਵਨ ਵਿੱਚ ਭਰਤੀ ਸੰਬੰਧੀ ਇਕ ਵਿਸ਼ੇਸ਼ ਮੀਟਿੰਗ ਰੱਖੀ ਗਈ ਹੈ।
ਭਰਤੀ ਕਮੇਟੀ ਵੱਲੋਂ ਜਾਰੀ ਬਿਆਨ ਅਨੁਸਾਰ, ਇਸ ਮੀਟਿੰਗ ਦੌਰਾਨ ਭਰਤੀ ਮੁਹਿੰਮ ਦੌਰਾਨ ਹੁਣ ਤੱਕ ਕੀਤੇ ਗਏ ਕੰਮ ਦੀ ਸਮੀਖਿਆ ਕੀਤੀ ਜਾਵੇਗੀ। ਨਾਲ ਹੀ ਜੋ ਵਰਕਰ ਭਰਤੀ ਫਾਰਮ ਭਰ ਚੁੱਕੇ ਹਨ, ਉਨ੍ਹਾਂ ਨੂੰ ਆਪਣੀਆਂ ਭਰੀਆਂ ਕਾਪੀਆਂ ਨਿਰਧਾਰਤ ਪ੍ਰਫਾਰਮੇ ਹੇਠ ਜਮ੍ਹਾ ਕਰਵਾਉਣ ਦੀ ਸਖ਼ਤ ਹਦਾਇਤ ਦਿੱਤੀ ਗਈ ਹੈ। ਜਿਨ੍ਹਾਂ ਕੋਲ ਅਜੇ ਤੱਕ ਅਣਭਰੀਆਂ ਕਾਪੀਆਂ ਹਨ, ਉਹ ਉਨ੍ਹਾਂ ਦੀ ਲਿਸਟ ਲੈ ਕੇ ਮੀਟਿੰਗ ਵਿੱਚ ਪਹੁੰਚਣ।
ਭਵਿੱਖੀ ਯੋਜਨਾ ਬਾਰੇ ਜਾਣਕਾਰੀ ਦਿੰਦਿਆਂ ਕਮੇਟੀ ਨੇ ਦੱਸਿਆ ਕਿ ਭਰਤੀ ਮੁਹਿੰਮ ਨੂੰ 18 ਜੂਨ ਤੋਂ ਬਾਅਦ ਅੱਗੇ ਨਹੀਂ ਵਧਾਇਆ ਜਾਵੇਗਾ। ਇਹ ਮਿਤੀ ਆਖਰੀ ਹੋਵੇਗੀ ਜਦ ਤੱਕ ਦੀਆਂ ਕਾਪੀਆਂ ਕਮੇਟੀ ਕੋਲ ਜਮ੍ਹਾ ਹੋਣੀਆਂ ਹਨ। ਇਸ ਤੋਂ ਬਾਅਦ ਭਰਤੀ ਦੀਆਂ ਕਾਪੀਆਂ ਦੀ ਪੂਰੀ ਸਕਰੂਟਨੀ ਕਰਕੇ, ਜੱਥੇਬੰਧਕ ਚੋਣਾਂ ਵਾਸਤੇ ਡੇਲੀਗੇਟ ਦੀ ਚੋਣ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਜਾਵੇਗੀ। ਇਸ ਸੰਬੰਧੀ ਹਲਕਾ ਅਨੁਸਾਰ ਤਾਰੀਖਾਂ ਦਾ ਐਲਾਨ ਵੀ ਜਲਦ ਹੀ ਕੀਤਾ ਜਾਵੇਗਾ।
ਕਮੇਟੀ ਨੇ ਅੰਤ ਵਿੱਚ ਇਹ ਵੀ ਕਿਹਾ ਕਿ ਉਹ ਸਾਰੇ ਸਰਗਰਮ ਅਕਾਲੀ ਵਰਕਰ ਜਿਨ੍ਹਾਂ ਨੇ ਪੰਜ ਜਾਂ ਉਸ ਤੋਂ ਵੱਧ ਭਰਤੀ ਕਾਪੀਆਂ ਭਰੀਆਂ ਹਨ, ਉਹ ਇਸ ਅਹਿਮ ਮੀਟਿੰਗ ਵਿੱਚ ਜ਼ਰੂਰ ਹਾਜ਼ਰੀ ਲੈਣ- ਤਾਂ ਜੋ ਪਾਰਟੀ ਦੀ ਨਵੀ ਰਚਨਾ ਵਿੱਚ ਉਨ੍ਹਾਂ ਦੀ ਭੂਮਿਕਾ ਨਿਰਧਾਰਤ ਕੀਤੀ ਜਾ ਸਕੇ।
ਇਹ ਮੀਟਿੰਗ ਨਾ ਸਿਰਫ਼ ਸੰਖੇਪ ਸਮੀਖਿਆ ਲਈ ਹੈ, ਬਲਕਿ ਪਾਰਟੀ ਦੇ ਨਵੇਂ ਆਧਾਰ ਬਣਾਉਣ ਦੀ ਸ਼ੁਰੂਆਤ ਵੀ ਹੋ ਸਕਦੀ ਹੈ।
Get all latest content delivered to your email a few times a month.
