ਤਾਜਾ ਖਬਰਾਂ
ਚੰਡੀਗੜ੍ਹ, 23 ਜੂਨ– ਪੰਜਾਬ ਦੇ ਸਕੂਲੀ ਬੱਚਿਆਂ ਲਈ ਚੱਲ ਰਹੀ ਮਿਡ-ਡੇਅ ਮੀਲ ਸਕੀਮ ਨੂੰ ਹੋਰ ਪ੍ਰਭਾਵਸ਼ਾਲੀ ਅਤੇ ਆਧੁਨਿਕ ਬਣਾਉਣ ਲਈ ਕੇਂਦਰ ਸਰਕਾਰ ਨੇ ਵੱਡੀ ਮਦਦ ਕੀਤੀ ਹੈ। ਪ੍ਰਧਾਨ ਮੰਤਰੀ ਪੋਸ਼ਣ ਯੋਜਨਾ ਤਹਿਤ ਸਾਲ 2024-25 ਲਈ ਪੰਜਾਬ ਨੂੰ 26.57 ਕਰੋੜ ਰੁਪਏ ਦੀ ਗ੍ਰਾਂਟ ਜਾਰੀ ਕੀਤੀ ਗਈ ਹੈ। ਇਸ ਰਕਮ ਦਾ ਉਦੇਸ਼ ਰਾਜ ਦੇ 23 ਜ਼ਿਲ੍ਹਿਆਂ ਵਿੱਚ ਮਿਡ-ਡੇਅ ਮੀਲ ਦੀ ਵਰਤੋਂ ਲਈ ਵਰਤੇ ਜਾ ਰਹੇ ਉਪਕਰਣਾਂ ਨੂੰ ਜਾਂ ਤਾਂ ਨਵਾਂ ਖਰੀਦਣਾ ਜਾਂ ਪੁਰਾਣਿਆਂ ਦੀ ਬਦਲੀ ਕਰਨੀ ਹੈ।
ਉਪਕਰਣਾਂ ਵਿੱਚ ਗੈਸ ਚੁੱਲ੍ਹੇ, ਭਾਂਡੇ, ਐਲਪੀਜੀ ਸਿਲੰਡਰ, ਪਾਣੀ ਦੇ ਡਰੰਮ ਆਦਿ ਸ਼ਾਮਲ ਹਨ। ਇਸ ਯੋਜਨਾ ਨਾਲ 18,991 ਸਰਕਾਰੀ ਸਕੂਲ ਲਾਭਪਾਤਰੀ ਬਣਨਗੇ। ਇਨ੍ਹਾਂ ਵਿੱਚ 214 ਸਕੂਲਾਂ ਲਈ ਨਵੇਂ ਉਪਕਰਣ ਖਰੀਦੇ ਜਾਣਗੇ, ਜਦਕਿ 18,777 ਸਕੂਲਾਂ ਵਿੱਚ ਪੁਰਾਣੇ ਉਪਕਰਣਾਂ ਦੀ ਬਦਲੀ ਹੋਵੇਗੀ। ਲੁਧਿਆਣਾ ਜ਼ਿਲ੍ਹਾ ਇਸ ਯੋਜਨਾ ਤਹਿਤ ਸਭ ਤੋਂ ਵੱਧ ਲਾਭ ਉਠਾਉਣ ਵਾਲਾ ਬਣਿਆ ਹੈ, ਜਦਕਿ ਨਵਾਂਸ਼ਹਿਰ ਨੇ ਨਵੇਂ ਉਪਕਰਣਾਂ ਲਈ ਸਭ ਤੋਂ ਵੱਧ 11.35 ਲੱਖ ਰੁਪਏ ਦੀ ਰਕਮ ਪ੍ਰਾਪਤ ਕੀਤੀ ਹੈ। ਉਲਟ, ਸੰਗਰੂਰ ਨੂੰ ਸਿਰਫ਼ 10,000 ਰੁਪਏ ਦੀ ਸਹਾਇਤਾ ਮਿਲੀ ਹੈ।
ਇਸ ਦੌਰਾਨ ਸਿੱਖਿਆ ਵਿਭਾਗ ਨੇ ਸਕੂਲਾਂ ਨੂੰ ਨਿਰਦੇਸ਼ ਦਿੱਤੇ ਹਨ ਕਿ ਉਪਲੱਬਧ ਫੰਡਾਂ ਦੀ ਵਰਤੋਂ ਨਿਯਮਾਂ ਅਤੇ ਸਮੇਂ ਦੇ ਅੰਦਰ ਕੀਤੀ ਜਾਵੇ। ਇਸਦੇ ਨਾਲ ਹੀ, ਪ੍ਰਮਾਣਿਤ ਵਰਤੋਂ ਰਿਪੋਰਟ ਹੈੱਡਕੁਆਰਟਰ ਨੂੰ ਭੇਜਣੀ ਲਾਜ਼ਮੀ ਬਣਾਈ ਗਈ ਹੈ, ਤਾਂ ਜੋ ਪਾਰਦਰਸ਼ਤਾ ਨੂੰ ਬਰਕਰਾਰ ਰੱਖਿਆ ਜਾ ਸਕੇ।
ਇਹ ਫੈਸਲਾ ਰਾਜ ਸਰਕਾਰ ਵੱਲੋਂ ਕੀਤੇ ਗਏ ਸਰਵੇਖਣ ਦੇ ਆਧਾਰ 'ਤੇ ਲਿਆ ਗਿਆ ਹੈ, ਜਿਸ ਵਿੱਚ ਸਕੂਲਾਂ ਦੀ ਰਸੋਈ ਵਿਵਸਥਾ ਅਤੇ ਉਪਕਰਣਾਂ ਦੀ ਹਾਲਤ ਦਾ ਮੁਲਾਂਕਣ ਕੀਤਾ ਗਿਆ ਸੀ। ਉਮੀਦ ਜਤਾਈ ਜਾ ਰਹੀ ਹੈ ਕਿ ਇਸ ਮਦਦ ਨਾਲ ਸਕੂਲਾਂ ਵਿੱਚ ਮਿਡ-ਡੇਅ ਮੀਲ ਦੀ ਗੁਣਵੱਤਾ ਵਿੱਚ ਨਿਰੰਤਰ ਸੁਧਾਰ ਆਵੇਗਾ ਅਤੇ ਲਗਭਗ 15.24 ਲੱਖ ਬੱਚਿਆਂ ਦੀ ਪੋਸ਼ਣ ਸਥਿਤੀ ਉੱਤੇ ਸਕਾਰਾਤਮਕ ਅਸਰ ਪਵੇਗਾ।
Get all latest content delivered to your email a few times a month.
