ਤਾਜਾ ਖਬਰਾਂ
ਰਾਂਚੀ – ਝਾਰਖੰਡ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ ਲਗਾਤਾਰ ਹੋ ਰਹੀ ਭਾਰੀ ਬਾਰਿਸ਼ ਨੇ ਆਮ ਜੀਵਨ ਨੂੰ ਪ੍ਰਭਾਵਿਤ ਕੀਤਾ ਹੈ। ਰਾਜ ਦੇ ਕਈ ਜ਼ਿਲ੍ਹਿਆਂ ਜਿਵੇਂ ਕਿ ਰਾਂਚੀ, ਹਜ਼ਾਰੀਬਾਗ, ਰਾਮਗੜ੍ਹ, ਲਾਤੇਹਾਰ, ਬੋਕਾਰੋ, ਗਿਰੀਡੀਹ ਅਤੇ ਜਮਸ਼ੇਦਪੁਰ ਵਿੱਚ ਹੇਠਲੇ ਇਲਾਕਿਆਂ ਵਿੱਚ ਪਾਣੀ ਘਰਾਂ ਤੱਕ ਦਾਖਲ ਹੋ ਗਿਆ ਹੈ। ਸੜਕਾਂ ਤੇ ਪਾਣੀ ਖੜਾ ਹੋਣ ਕਾਰਨ ਆਵਾਜਾਈ ਵਿੱਚ ਰੁਕਾਵਟ ਆਈ ਹੈ। ਨਦੀਆਂ, ਝਰਨਿਆਂ ਅਤੇ ਜਲ ਭੰਡਾਰਾਂ ਵਿੱਚ ਪਾਣੀ ਦੇ ਪੱਧਰ 'ਚ ਵਾਧੇ ਨਾਲ ਘਰ ਢਹਿਣ ਅਤੇ ਲੋਕਾਂ ਦੇ ਡੁੱਬਣ ਦੀਆਂ ਹਾਦਸੇ ਵੱਧ ਰਹੇ ਹਨ।
ਹਜ਼ਾਰੀਬਾਗ ਦੇ ਰਸੋਈ ਧਮਨਾ ਬਾਰਾਟੋਲਾ ਪਿੰਡ ਵਿੱਚ ਇੱਕ ਪੁਰਾਣਾ ਘਰ ਮੀਂਹ ਦੌਰਾਨ ਢਹਿ ਗਿਆ, ਜਿਸ ਵਿਚ 50 ਸਾਲਾ ਹਬੀਬ ਅੰਸਾਰੀ ਅਤੇ ਉਸਦੀ ਪਤਨੀ ਜੁਮੇਰਾ ਖਾਤੂਨ ਦੀ ਮਲਬੇ ਹੇਠ ਦੱਬਣ ਨਾਲ ਮੌਤ ਹੋ ਗਈ। ਪਿੰਡ ਵਾਸੀਆਂ ਨੇ ਦੋਹਾਂ ਦੀਆਂ ਲਾਸ਼ਾਂ ਸੋਮਵਾਰ ਸਵੇਰੇ ਬਾਹਰ ਕੱਢੀਆਂ।
ਇਸਦੇ ਨਾਲ-ਨਾਲ ਪਲਾਮੂ ਜ਼ਿਲ੍ਹੇ ਵਿੱਚ ਵੀ ਦਰਦਨਾਕ ਹਾਦਸੇ ਹੋਏ। ਉਕਸੂ ਪਿੰਡ ਵਿੱਚ 12 ਸਾਲਾ ਰਾਕੇਸ਼ ਕੁਮਾਰ ਅਤੇ ਬਸਰੀਆ ਪਿੰਡ ਵਿੱਚ 14 ਸਾਲਾ ਸਮੀਰ ਅੰਸਾਰੀ ਅਮਾਨਤ ਨਦੀ ਵਿੱਚ ਨਹਾਉਂਦੇ ਸਮੇਂ ਵਹਿ ਗਏ। ਰਾਕੇਸ਼ ਦੀ ਲਾਸ਼ ਮਿਲ ਚੁੱਕੀ ਹੈ, ਜਦਕਿ ਸਮੀਰ ਦੀ ਭਾਲ ਜਾਰੀ ਹੈ। ਇਸ ਤੋਂ ਪਹਿਲਾਂ ਪਲਾਮੂ ਸ਼ਹਿਰ ਦੇ ਬਦਕਾਬੰਦ ਇਲਾਕੇ ਵਿੱਚ ਵੀ ਦੋ ਹੋਰ ਬੱਚੇ ਡੁੱਬ ਕੇ ਮਾਰੇ ਗਏ ਸਨ।
ਬੋਕਾਰੋ ਦੇ ਚੰਦਰਪੁਰਾ ਖੇਤਰ ਵਿੱਚ ਨਵੇਂ ਬਣੇ ਜਾਮੁਨੀਆ ਪੁਲ ਦਾ ਇੱਕ ਹਿੱਸਾ ਤੇਜ਼ ਵਹਾਅ ਕਾਰਨ ਵਹਿ ਗਿਆ, ਜਿਸਦਾ ਉਦਘਾਟਨ ਵੀ ਨਹੀਂ ਹੋਇਆ ਸੀ। ਇਧਰ ਖੂੰਟੀ ਦੇ ਪ੍ਰਸਿੱਧ ਪੰਚਘਾਘ ਝਰਨੇ ਦੇ ਪਾਣੀ ਪੱਧਰ 'ਚ ਵਾਧੇ ਕਰਕੇ ਲੋਕਾਂ ਦੀ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦਿਆਂ ਪ੍ਰਸ਼ਾਸਨ ਨੇ ਥਾਂ ਤੱਕ ਜਾਣ ਵਾਲੀ ਸੜਕ ਨੂੰ ਅਸਥਾਈ ਤੌਰ ਤੇ ਬੰਦ ਕਰ ਦਿੱਤਾ ਹੈ।
ਮੌਸਮ ਵਿਭਾਗ ਮੁਤਾਬਕ, ਰਾਜ ਭਰ ਵਿੱਚ ਆਮ ਨਾਲੋਂ 102% ਵੱਧ ਬਾਰਿਸ਼ ਹੋਈ ਹੈ। ਰਾਂਚੀ ਵਿੱਚ 265%, ਲਾਤੇਹਾਰ ਵਿੱਚ 241%, ਲੋਹਰਦਗਾ ਵਿੱਚ 190%, ਸਰਾਏਕੇਲਾ-ਖਰਸਾਵਨ ਵਿੱਚ 172% ਅਤੇ ਪਲਾਮੂ ਵਿੱਚ 156% ਵਾਧਾ ਦਰਜ ਕੀਤਾ ਗਿਆ। ਸਿਰਫ਼ ਤਿੰਨ ਜ਼ਿਲ੍ਹੇ – ਦੇਵਘਰ, ਗੋਡਾ ਅਤੇ ਪਾਕੁਰ – ਜਿਹਥੇ ਆਮ ਨਾਲੋਂ 12% ਤੋਂ 19% ਘੱਟ ਬਾਰਿਸ਼ ਹੋਈ ਹੈ।
ਇਸ ਅਸਧਾਰਣ ਮੀਂਹ ਨੇ ਨਾਂ ਕੇਵਲ ਜਾਨੀ ਨੁਕਸਾਨ ਕੀਤਾ ਹੈ, ਸਗੋਂ ਢਾਂਚਾਗਤ ਨੁਕਸਾਨ ਵੀ ਕਰਦਿਆਂ ਸੂਬੇ ਲਈ ਚਿੰਤਾ ਦਾ ਵਿਸ਼ਾ ਬਣ ਗਿਆ ਹੈ।
Get all latest content delivered to your email a few times a month.
