ਜਲੰਧਰ ਸਿਵਲ ਹਸਪਤਾਲ 'ਚ ਮਰੀਜ਼ਾਂ ਦੀ ਮੌਤ ਦੇ ਮਾਮਲੇ 'ਚ ਸੁਪਰਵਾਈਜ਼ਰ ਬਰਖ਼ਾਸਤ

ਚੰਡੀਗੜ੍ਹ- ਜਲੰਧਰ ਸਿਵਲ ਹਸਪਤਾਲ ਵਿਚ ਚੰਡੀਗੜ੍ਹ ਤੋਂ ਆਕਸੀਜਨ ਪਲਾਂਟ ਦੇ ਸੁਪਰਵਾਈਜ਼ਰ ਨਰਿੰਦਰ ਕੁਮਾਰ ਨੂੰ ਵੀ ਬਰਖ਼ਾਸਤ ਕਰ ਦਿੱਤਾ ਗਿਆ। ਚੰਡੀਗੜ੍ਹ ਤੋਂ ਆਏ ਹੁਕਮਾਂ ਵਿਚ ਸੁਪਰਵਾਈਜ਼ਰ ਦੀ ਲਾਪਰਵਾਹੀ ਦਾ ਖੁਲਾਸਾ ਹੋਇਆ ਹੈ। ਇਸ ਤੋਂ ਪਹਿਲਾਂ ਤਿੰਨ ਡਾਕਟਰਾਂ ਅਤੇ ਇਕ ਹਾਊਸ ਸਰਜਨ ਨੂੰ ਬਰਖ਼ਾਸਤ ਕੀਤਾ ਗਿਆ ਹੈ।

ਦੱਸ ਦੇਈਏ ਕਿ ਐਤਵਾਰ ਸ਼ਾਮ ਨੂੰ ਸਿਵਲ ਹਸਪਤਾਲ ਦੇ ਟਰਾਮਾ ਸੈਂਟਰ ਵਿਚ ਆਕਸੀਜਨ ਪ੍ਰੈਸ਼ਰ ਘੱਟ ਹੋਣ ਕਾਰਨ ਤਿੰਨ ਮਰੀਜ਼ਾਂ ਦੀ ਮੌਤ ਹੋ ਗਈ ਸੀ। ਇਸ ਮਾਮਲੇ ਵਿਚ, ਸਿਹਤ ਮੰਤਰੀ ਡਾ. ਬਲਬੀਰ ਸਿੰਘ ਨੇ ਐਮ.ਐਸ. ਡਾ. ਰਾਜਕੁਮਾਰ, ਐਸ.ਐਮ.ਓ. ਡਾ. ਸੁਰਜੀਤ, ਅਨੱਸਥੀਸੀਆ ਦੀ ਡਾਕਟਰ ਸੋਨਾਕਸ਼ੀ ਨੂੰ ਮੁਅੱਤਲ ਕਰ ਦਿੱਤਾ ਅਤੇ ਹਾਊਸ ਸਰਜਨ ਨੂੰ ਡਿਊਟੀ ਤੋਂ ਗੈਰਹਾਜ਼ਰ ਰਹਿਣ ਕਾਰਨ ਬਰਖਾਸਤ ਕਰ ਦਿੱਤਾ। ਇਸ ਦੇ ਨਾਲ ਹੀ ਆਕਸੀਜਨ ਪਲਾਂਟ ਸੁਪਰਵਾਈਜ਼ਰ ਨਰਿੰਦਰ ਕੁਮਾਰ ਨੂੰ ਸ਼ੁੱਕਰਵਾਰ ਨੂੰ ਬਰਖ਼ਾਸਤ ਕਰ ਦਿੱਤਾ ਗਿਆ, ਕਿਉਂਕਿ ਹਾਦਸੇ ਦੌਰਾਨ, ਗ੍ਰੇਡ-4 ਕਰਮਚਾਰੀ ਆਕਸੀਜਨ ਪਲਾਂਟ ਵਿਚ ਡਿਊਟੀ ’ਤੇ ਸੀ। ਇਸ ਦੌਰਾਨ ਸੁਪਰਵਾਈਜ਼ਰ ਛੁੱਟੀ ’ਤੇ ਸੀ। ਇਸ ਲਈ, ਲਾਪਰਵਾਹੀ ਦੇ ਮੱਦੇਨਜ਼ਰ, ਸਿਵਲ ਹਸਪਤਾਲ ਵਿਚ ਆਊਟਸੋਰਸਿੰਗ ’ਤੇ ਕੰਮ ਕਰ ਰਹੇ ਸੁਪਰਵਾਈਜ਼ਰ ਨੂੰ ਵੀ ਬਰਖ਼ਾਸਤ ਕਰ ਦਿੱਤਾ ਗਿਆ ਹੈ। ਵੈਸੇ, ਆਕਸੀਜਨ ਪਲਾਂਟ ਵਿਚ ਦੋ ਸੁਪਰਵਾਈਜ਼ਰ ਅਤੇ ਇਕ ਗ੍ਰੇਡ-4 ਕਰਮਚਾਰੀ ਡਿਊਟੀ ’ਤੇ ਹਨ। ਦੋ ਸੁਪਰਵਾਈਜ਼ਰਾਂ ਨੇ 1 ਸਾਲ ਪਹਿਲਾਂ ਤਨਖਾਹ ਵਿਚ ਕਟੌਤੀ ਕਾਰਨ ਨੌਕਰੀ ਛੱਡ ਦਿੱਤੀ ਸੀ। ਇਸ ਲਈ ਗ੍ਰੇਡ-4 ਕਰਮਚਾਰੀਆਂ ਨੂੰ ਡਿਊਟੀ ’ਤੇ ਲਗਾਇਆ ਗਿਆ ਸੀ। ਦੂਜੇ ਪਾਸੇ, ਪੀ.ਸੀ.ਐਮ.ਐਸ. ਦੇ ਪੰਜਾਬ ਮੁਖੀ ਡਾ. ਅਖਿਲ ਸਰੀਨ ਸ਼ੁੱਕਰਵਾਰ ਨੂੰ ਸਿਵਲ ਹਸਪਤਾਲ ਪਹੁੰਚੇ। ਇਸ ਦੌਰਾਨ ਉਨ੍ਹਾਂ ਨੇ ਮੁਅੱਤਲ ਅਤੇ ਬਰਖ਼ਾਸਤ ਕਰਮਚਾਰੀਆਂ ਨਾਲ ਮੁਲਾਕਾਤ ਕੀਤੀ।