ਲੁਧਿਆਣਾ: ਨਵਜੰਮੇ ਬੱਚੇ ਦੀ ਮਾਂ ਨੇ ਕੀਤਾ ਹੈਰਾਨੀਜਨਕ ਕੰਮ, ਢਾਈ ਲੱਖ ਵਿੱਚ ਵੇਚਿਆ ਆਪਣਾ ਲਾਲ

ਲੁਧਿਆਣਾ ਦੇ ਦੁੱਗਰੀ ਇਲਾਕੇ ਤੋਂ ਇਕ ਚੌਕਾਣ ਵਾਲੀ ਘਟਨਾ ਸਾਹਮਣੇ ਆਈ ਹੈ ਜਿੱਥੇ ਇਕ ਔਰਤ ਨੇ ਆਪਣੇ ਹੀ ਨਵਜੰਮੇ ਪੁੱਤਰ ਨੂੰ ਢਾਈ ਲੱਖ ਰੁਪਏ ਵਿੱਚ ਵੇਚ ਦਿੱਤਾ। ਇਹ ਰਾਜ ਉਸ ਵੇਲੇ ਖੁਲ੍ਹਿਆ ਜਦੋਂ ਸਹੁਰੇ ਪਰਿਵਾਰ ਨੂੰ ਸ਼ੱਕ ਹੋਇਆ ਅਤੇ ਉਨ੍ਹਾਂ ਨੇ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਈ।

ਪੁਲਿਸ ਜਾਂਚ ਦੌਰਾਨ ਖੁਲਾਸਾ ਹੋਇਆ ਕਿ ਰੀਤਾ ਨਾਮਕ ਔਰਤ ਨੇ ਆਪਣੇ ਬੱਚੇ ਨੂੰ ਵੇਚਣ ਦੀ ਸਾਜ਼ਿਸ਼ ਆਸ਼ਾ ਵਰਕਰ ਰੇਣੂ ਦੀ ਮਦਦ ਨਾਲ ਰਚੀ ਸੀ। ਰੀਤਾ ਦੇ ਸਹੁਰੇ ਗਜਰਾਜ ਸਿੰਘ ਨੇ ਦੱਸਿਆ ਕਿ ਪਹਿਲਾਂ ਉਸਦੀ ਨੂੰਹ ਨੇ ਕਿਹਾ ਸੀ ਕਿ ਬੱਚਾ ਜਨਮ ਤੋਂ ਹੀ ਮ੍ਰਿਤਕ ਸੀ, ਪਰ ਸ਼ੱਕ ਪੈਣ ‘ਤੇ ਗੱਲ ਸਾਹਮਣੇ ਆ ਗਈ।

ਦੁੱਗਰੀ ਪੁਲਿਸ ਨੇ ਰੀਤਾ, ਉਸਦੀ ਮਾਂ ਪ੍ਰੇਮਾ ਦੇਵੀ, ਆਸ਼ਾ ਵਰਕਰ ਰੇਣੂ, ਨਿੱਜੀ ਹਸਪਤਾਲ ਦੇ ਸਟਾਫ ਰਾਮ ਕੁਮਾਰ ਅਤੇ ਹੋਰ ਅਣਪਛਾਤੇ ਲੋਕਾਂ ਵਿਰੁੱਧ ਮਾਮਲਾ ਦਰਜ ਕੀਤਾ ਹੈ। ਹਾਲਾਂਕਿ ਰੇਣੂ ਅਤੇ ਉਸਦੇ ਸਾਥੀ ਇਸ ਵੇਲੇ ਫਰਾਰ ਹਨ, ਪਰ ਰੀਤਾ ਅਤੇ ਉਸਦੀ ਮਾਂ ਘਰ ‘ਚ ਮੌਜੂਦ ਹਨ। ਪੁਲਿਸ ਨੇ ਦੋਨੋਂ ਨੂੰ ਹਾਲੇ ਗ੍ਰਿਫ਼ਤਾਰ ਨਹੀਂ ਕੀਤਾ।

ਜਾਂਚ ਅਨੁਸਾਰ, ਰੀਤਾ ਦਾ ਪਤੀ ਲੰਬੇ ਸਮੇਂ ਤੋਂ ਇਕ ਗੰਭੀਰ ਬਿਮਾਰੀ ਨਾਲ ਜੂਝ ਰਿਹਾ ਸੀ, ਜਿਸ ਕਾਰਨ ਪਰਿਵਾਰ ਦੀ ਮਾਲੀ ਹਾਲਤ ਵੀ ਕਮਜ਼ੋਰ ਹੋ ਗਈ ਸੀ। ਸ਼ੱਕ ਹੈ ਕਿ ਇਸੇ ਦਬਾਅ ਕਾਰਨ ਇਹ ਗੰਭੀਰ ਫੈਸਲਾ ਲਿਆ ਗਿਆ।