ਤਾਜਾ ਖਬਰਾਂ
ਆਮ ਆਦਮੀ ਪਾਰਟੀ ਦੇ ਸੀਨੀਅਰ ਨੇਤਾ ਅਤੇ ਵਿਧਾਇਕ ਕੁਲਦੀਪ ਸਿੰਘ ਧਾਲੀਵਾਲ ਨੇ ਕਾਂਗਰਸ ਆਗੂ ਪ੍ਰਤਾਪ ਸਿੰਘ ਬਾਜਵਾ ਅਤੇ ਸੁਖਜਿੰਦਰ ਸਿੰਘ ਰੰਧਾਵਾ ਖ਼ਿਲਾਫ਼ ਤਿੱਖਾ ਰਵੱਈਆ ਅਖ਼ਤਿਆਰ ਕੀਤਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਨਵਜੋਤ ਕੌਰ ਸਿੱਧੂ ਵੱਲੋਂ ਕਾਂਗਰਸ ਅੰਦਰ 500 ਕਰੋੜ ਰੁਪਏ ਦੇ ਭ੍ਰਿਸ਼ਟਾਚਾਰ ਦੇ ਗੰਭੀਰ ਇਲਜ਼ਾਮ ਲਗਾਏ ਗਏ ਹਨ, ਪਰ ਹੈਰਾਨੀ ਹੈ ਕਿ ਜਿਹੜੇ ਨੇਤਾ ਹਰ ਮੁੱਦੇ 'ਤੇ ਬੇਝਿਝਕ ਬੋਲਦੇ ਰਹੇ ਹਨ, ਉਹ ਇਸ ਮਾਮਲੇ 'ਚ ਪੂਰੀ ਤਰ੍ਹਾਂ ਚੁੱਪ ਹਨ। ਧਾਲੀਵਾਲ ਦਾ ਦਾਅਵਾ ਹੈ ਕਿ ਕਾਂਗਰਸੀ ਨੇਤਾਵਾਂ ਦੀ ਇਹ ਚੁੱਪੀ ਇਸ ਗੱਲ ਦੀ ਪੁਸ਼ਟੀ ਕਰਦੀ ਹੈ ਕਿ ਦੋਸ਼ ਸੱਚਾਈ ਵੱਲ ਇਸ਼ਾਰਾ ਕਰਦੇ ਹਨ।
ਧਾਲੀਵਾਲ ਨੇ ਪ੍ਰਤਾਪ ਬਾਜਵਾ ਨੂੰ ਖ਼ਾਸ ਤੌਰ 'ਤੇ ਨਿਸ਼ਾਨਾ ਬਣਾਉਂਦੇ ਹੋਏ ਕਿਹਾ ਕਿ ਜਨਤਾ ਜਾਣਨਾ ਚਾਹੁੰਦੀ ਹੈ ਕਿ ਇਨ੍ਹਾਂ ਗੰਭੀਰ ਇਲਜ਼ਾਮਾਂ 'ਤੇ ਉਹ ਆਪਣਾ ਮੱਤ ਕਿਉਂ ਨਹੀਂ ਰੱਖ ਰਹੇ। ਉਨ੍ਹਾਂ ਨੇ ਦੱਸਿਆ ਕਿ ਬਾਜਵਾ 'ਤੇ ਤਰਨਤਾਰਨ ਲੋਕ ਸਭਾ ਸੀਟ ਵੇਚਣ ਦੇ ਇਲਜ਼ਾਮ ਵੀ ਲੱਗੇ ਸਨ ਅਤੇ ਇਹ ਸੰਭਵ ਹੈ ਕਿ ਇਸ ਕਰਕੇ ਵੀ ਉਹ ਚੁੱਪੀ ਵਰਤ ਰਹੇ ਹਨ। ਧਾਲੀਵਾਲ ਨੇ ਸਿੱਧਾ ਸਵਾਲ ਉਠਾਇਆ ਕਿ ਕੀ ਕਾਂਗਰਸ ਅੰਦਰ ਸੱਚਮੁੱਚ ਟਿਕਟਾਂ ਅਤੇ ਅਹੁਦਿਆਂ ਦੀ ਖ਼ਰੀਦ-ਫ਼ਰੋਖ਼ਤ ਹੋ ਰਹੀ ਹੈ ਅਤੇ ਕੀ 500 ਕਰੋੜ ਦੀ ਡੀਲ ਵਾਕਈ ਹੋਈ?
ਉਨ੍ਹਾਂ ਨੇ ਕਿਹਾ ਕਿ ਜੇਕਰ ਪ੍ਰਤਾਪ ਬਾਜਵਾ ਅਤੇ ਹੋਰ ਕਾਂਗਰਸੀ ਨੇਤਾ ਇਸ ਮਾਮਲੇ 'ਤੇ ਖੁੱਲ੍ਹ ਕੇ ਜਵਾਬ ਨਹੀਂ ਦਿੰਦੇ, ਤਾਂ ਲੋਕ ਇਹ ਮੰਨਣ 'ਤੇ ਮਜਬੂਰ ਹੋ ਜਾਣਗੇ ਕਿ ਕਾਂਗਰਸ ਹਾਈਕਮਾਂਡ ਨੇ ਇਲਜ਼ਾਮਾਂ ਨੂੰ ਮੌਨ ਸਹਿਮਤੀ ਦੇ ਦਿੱਤੀ ਹੈ। ਧਾਲੀਵਾਲ ਨੇ ਦਾਅਵਾ ਕੀਤਾ ਕਿ ਜਨਤਾ ਹੁਣ ਇਸ ਚੁੱਪੀ ਨੂੰ ਜੁਰਮ ਦੀ ਸਵੀਕ੍ਰਿਤੀ ਵਜੋਂ ਦੇਖ ਰਹੀ ਹੈ, ਇਸ ਲਈ ਕਾਂਗਰਸ ਲਈ ਜ਼ਰੂਰੀ ਹੈ ਕਿ ਉਹ ਤੁਰੰਤ ਆਪਣੀ ਸਥਿਤੀ ਸਪੱਸ਼ਟ ਕਰੇ।
Get all latest content delivered to your email a few times a month.
