ਤਾਜਾ ਖਬਰਾਂ
ਕਰਨਾਟਕ ਹਾਈ ਕੋਰਟ ਨੇ ਇੱਕ ਮਹੱਤਵਪੂਰਨ ਫੈਸਲਾ ਸੁਣਾਉਂਦੇ ਹੋਏ ਸਪੱਸ਼ਟ ਕੀਤਾ ਹੈ ਕਿ ਜੇਕਰ ਆਪਸੀ ਸਹਿਮਤੀ ਨਾਲ ਬਣੇ ਰਿਸ਼ਤੇ ਦਾ ਅੰਤ ਵਿਆਹ ਵਿੱਚ ਨਾ ਹੋਵੇ, ਤਾਂ ਉਸ ਨੂੰ 'ਰੇਪ' (ਬਲਾਤਕਾਰ) ਦੀ ਸ਼੍ਰੇਣੀ ਵਿੱਚ ਨਹੀਂ ਰੱਖਿਆ ਜਾ ਸਕਦਾ। ਅਦਾਲਤ ਨੇ ਸਖ਼ਤ ਟਿੱਪਣੀ ਕਰਦਿਆਂ ਕਿਹਾ ਕਿ ਕਾਨੂੰਨ ਰਿਸ਼ਤੇ ਟੁੱਟਣ ਜਾਂ 'ਦਿਲ ਟੁੱਟਣ' ਨੂੰ ਅਪਰਾਧਿਕ ਕਾਰਵਾਈ ਨਹੀਂ ਮੰਨਦਾ।
ਇਹ ਮਾਮਲਾ ਇੱਕ ਮਹਿਲਾ ਵੱਲੋਂ ਆਪਣੇ ਸਾਬਕਾ ਸਾਥੀ ਵਿਰੁੱਧ ਭਾਰਤੀ ਦੰਡਾਵਲੀ (IPC) ਦੀ ਧਾਰਾ 376 ਤਹਿਤ ਦਰਜ ਕਰਵਾਈ ਗਈ ਸ਼ਿਕਾਇਤ ਨਾਲ ਸਬੰਧਤ ਸੀ। ਦੋਵਾਂ ਦੀ ਮੁਲਾਕਾਤ ਆਇਰਲੈਂਡ ਵਿੱਚ ਹੋਈ ਸੀ ਅਤੇ ਉਹ ਲਗਭਗ ਦੋ ਸਾਲ ਤੱਕ 'ਲਿਵ-ਇਨ ਰਿਲੇਸ਼ਨਸ਼ਿਪ' ਵਿੱਚ ਰਹੇ ਸਨ। ਮਹਿਲਾ ਪਹਿਲਾਂ ਤੋਂ ਤਲਾਕਸ਼ੁਦਾ ਸੀ ਅਤੇ ਉਸਦਾ ਇੱਕ ਬੱਚਾ ਵੀ ਸੀ। ਜਦੋਂ ਮੁਲਜ਼ਮ ਭਾਰਤ ਪਰਤਿਆ ਅਤੇ ਉਸਨੇ ਮਹਿਲਾ ਨਾਲ ਸੰਪਰਕ ਤੋੜ ਦਿੱਤਾ, ਤਾਂ ਮਹਿਲਾ ਨੇ ਧੋਖਾਧੜੀ ਅਤੇ ਰੇਪ ਦਾ ਦੋਸ਼ ਲਗਾਉਂਦੇ ਹੋਏ ਮਾਮਲਾ ਦਰਜ ਕਰਵਾਇਆ।
ਹਾਈ ਕੋਰਟ ਦੀਆਂ ਅਹਿਮ ਟਿੱਪਣੀਆਂ
ਜਸਟਿਸ ਐਮ. ਨਾਗਪ੍ਰਸੰਨਾ ਨੇ ਮਾਮਲੇ ਦੀ ਸੁਣਵਾਈ ਕਰਦੇ ਹੋਏ ਕਈ ਮਹੱਤਵਪੂਰਨ ਨੁਕਤੇ ਸਾਂਝੇ ਕੀਤੇ:
ਅਦਾਲਤ ਨੇ ਕਿਹਾ ਕਿ ਜਦੋਂ ਦੋ ਬਾਲਗ ਆਪਣੀ ਮਰਜ਼ੀ ਨਾਲ ਲੰਬੇ ਸਮੇਂ ਤੱਕ ਸਰੀਰਕ ਸਬੰਧ ਬਣਾਉਂਦੇ ਹਨ, ਤਾਂ ਬਾਅਦ ਵਿੱਚ ਵਿਆਹ ਤੋਂ ਇਨਕਾਰ ਕਰਨਾ ਉਸ ਰਿਸ਼ਤੇ ਨੂੰ 'ਰੇਪ' ਵਿੱਚ ਨਹੀਂ ਬਦਲਦਾ।
ਵਿਆਹ ਦਾ ਝੂਠਾ ਵਾਅਦਾ ਕੇਵਲ ਉਦੋਂ ਮੰਨਿਆ ਜਾਂਦਾ ਹੈ, ਜਦੋਂ ਮਰਦ ਦੀ ਨੀਅਤ ਸ਼ੁਰੂ ਤੋਂ ਹੀ ਧੋਖਾ ਦੇਣ ਦੀ ਹੋਵੇ। ਜੇਕਰ ਰਿਸ਼ਤੇ ਦੌਰਾਨ ਭਾਵਨਾਤਮਕ ਤਾਲਮੇਲ ਦੀ ਕਮੀ ਜਾਂ ਪਰਿਵਾਰਕ ਵਿਰੋਧ ਕਾਰਨ ਵਿਆਹ ਨਹੀਂ ਹੋ ਪਾਉਂਦਾ, ਤਾਂ ਇਸ ਨੂੰ ਅਪਰਾਧਿਕ ਮਨਸ਼ਾ ਨਹੀਂ ਕਿਹਾ ਜਾ ਸਕਦਾ।
ਜਸਟਿਸ ਨੇ ਕਿਹਾ, "ਅਪਰਾਧਿਕ ਨਿਆਂ ਪ੍ਰਣਾਲੀ ਰਾਜ ਦੀ ਸ਼ਕਤੀ ਦਾ ਸਾਧਨ ਹੈ। ਇਸ ਨੂੰ ਅਸਫਲ ਰਿਸ਼ਤਿਆਂ ਦੇ ਨਿੱਜੀ ਵਿਵਾਦਾਂ ਵਿੱਚ ਹਥਿਆਰ ਵਜੋਂ ਵਰਤਣ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾ ਸਕਦੀ।"
ਵਿਸ਼ਵਾਸਘਾਤ ਬਨਾਮ ਬਲਾਤਕਾਰ
ਅਦਾਲਤ ਨੇ ਨੋਟ ਕੀਤਾ ਕਿ ਇਹ ਪੂਰੀ ਕਹਾਣੀ ਆਇਰਲੈਂਡ ਦੀ ਹੈ, ਜਿੱਥੇ ਉਹ ਇਕੱਠੇ ਰਹੇ ਅਤੇ ਜੀਵਨ ਬਿਤਾਇਆ। ਅਦਾਲਤ ਨੇ ਸਪੱਸ਼ਟ ਕੀਤਾ ਕਿ ਇਹ ਮਾਮਲਾ ਹਿੰਸਾ ਦਾ ਨਹੀਂ ਬਲਕਿ ਵਿਸ਼ਵਾਸਘਾਤ ਦਾ ਹੋ ਸਕਦਾ ਹੈ, ਅਤੇ ਕਾਨੂੰਨੀ ਤੌਰ 'ਤੇ "ਵਿਸ਼ਵਾਸਘਾਤ ਬਲਾਤਕਾਰ ਨਹੀਂ ਹੈ।"
Get all latest content delivered to your email a few times a month.
