ਜਲੰਧਰ ਕੈਂਟ ਸਟੇਸ਼ਨ 'ਤੇ ‘ਛੁੱਟੇ ਪੈਸਿਆਂ’ ਦਾ ਹੰਗਾਮਾ: ਮਹਿਲਾ ਕਲਰਕ ਨੇ ਯਾਤਰੀ ਨੂੰ ਟਿਕਟ ਦੇਣ ਤੋਂ ਨਾਂਹ ਕਰ ਦਿੱਤੀ, ਵੀਡੀਓ ਵਾਇਰਲ

ਜਲੰਧਰ ਕੈਂਟ ਰੇਲਵੇ ਸਟੇਸ਼ਨ 'ਤੇ ਉਸ ਵੇਲੇ ਮਾਹੌਲ ਤਣਾਅਪੂਰਨ ਹੋ ਗਿਆ ਜਦੋਂ ਇੱਕ ਮਹਿਲਾ ਟਿਕਟ ਕਲਰਕ ਅਤੇ ਯਾਤਰੀ ਵਿਚਕਾਰ ‘ਭਾਨ’ (ਛੁੱਟੇ ਪੈਸਿਆਂ) ਨੂੰ ਲੈ ਕੇ ਤਿੱਖੀ ਬਹਿਸ ਹੋ ਗਈ। ਮਾਮਲਾ ਇੰਨਾ ਵਧ ਗਿਆ ਕਿ ਮਹਿਲਾ ਮੁਲਾਜ਼ਮ ਨੇ ਯਾਤਰੀ ਨੂੰ ਟਿਕਟ ਦੇਣ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ ਅਤੇ ਆਰ.ਪੀ.ਐੱਫ. (RPF) ਬੁਲਾਉਣ ਦੀ ਧਮਕੀ ਦੇ ਦਿੱਤੀ। ਇਸ ਘਟਨਾ ਦੀ ਵੀਡੀਓ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋਣ ਤੋਂ ਬਾਅਦ ਰੇਲਵੇ ਵਿਭਾਗ ਵਿੱਚ ਹਲਚਲ ਮਚ ਗਈ ਹੈ।

ਜਾਣਕਾਰੀ ਮੁਤਾਬਕ ਇੱਕ ਯਾਤਰੀ ਨੇ ਟਿਕਟ ਲਈ 200 ਰੁਪਏ ਦਾ ਨੋਟ ਦਿੱਤਾ ਸੀ। ਮਹਿਲਾ ਕਲਰਕ ਨੇ ਖੁੱਲ੍ਹੇ ਪੈਸੇ ਨਾ ਹੋਣ ਦਾ ਹਵਾਲਾ ਦਿੰਦੇ ਹੋਏ ਯਾਤਰੀ ਨੂੰ ਖੁਦ ਪੈਸਿਆਂ ਦਾ ਇੰਤਜ਼ਾਮ ਕਰਨ ਲਈ ਕਿਹਾ। ਯਾਤਰੀ ਦਾ ਇਲਜ਼ਾਮ ਹੈ ਕਿ ਕਾਊਂਟਰ 'ਤੇ ਨਕਦੀ ਹੋਣ ਦੇ ਬਾਵਜੂਦ ਉਸ ਨੂੰ ਜਾਣਬੁੱਝ ਕੇ ਪ੍ਰੇਸ਼ਾਨ ਕੀਤਾ ਗਿਆ ਅਤੇ ਨਾ ਹੀ ਆਨਲਾਈਨ ਪੇਮੈਂਟ ਲਈ ਕੋਈ ਸਹੂਲਤ ਦਿੱਤੀ ਗਈ।

ਵੀਡੀਓ ਬਣਾਉਣ 'ਤੇ ਭੜਕੀ ਮਹਿਲਾ ਮੁਲਾਜ਼ਮ

ਜਦੋਂ ਬਹਿਸ ਵਧੀ ਤਾਂ ਯਾਤਰੀ ਨੇ ਮਹਿਲਾ ਕਰਮਚਾਰੀ ਦੇ ਵਤੀਰੇ ਦੀ ਵੀਡੀਓ ਬਣਾਉਣੀ ਸ਼ੁਰੂ ਕਰ ਦਿੱਤੀ। ਇਸ ਤੋਂ ਗੁੱਸੇ ਵਿੱਚ ਆ ਕੇ ਕਲਰਕ ਨੇ ਨਾ ਸਿਰਫ਼ ਪੈਸੇ ਵਾਪਸ ਕਰ ਦਿੱਤੇ, ਸਗੋਂ ਉਸ ਨੂੰ ਟਿਕਟ ਦੇਣ ਤੋਂ ਵੀ ਮਨ੍ਹਾ ਕਰ ਦਿੱਤਾ। ਵੀਡੀਓ ਵਿੱਚ ਮਹਿਲਾ ਕਰਮਚਾਰੀ ਬਹੁਤ ਹੀ ਗੁੱਸੇ ਵਿੱਚ ਗੱਲ ਕਰਦੀ ਅਤੇ ਯਾਤਰੀ ਨੂੰ ਡਰਾਉਂਦੀ ਹੋਈ ਨਜ਼ਰ ਆ ਰਹੀ ਹੈ।

ਰੇਲਵੇ ਮੰਤਰਾਲੇ ਅਤੇ DRM ਤੱਕ ਪਹੁੰਚੀ ਸ਼ਿਕਾਇਤ

ਸੋਸ਼ਲ ਮੀਡੀਆ ਯੂਜ਼ਰ ਕਲਪਨਾ ਸ਼੍ਰੀਵਾਸਤਵ ਨੇ ਇਸ ਵੀਡੀਓ ਨੂੰ ਰੇਲਵੇ ਮੰਤਰਾਲੇ ਅਤੇ ਫਿਰੋਜ਼ਪੁਰ ਡਿਵੀਜ਼ਨ ਦੇ DRM ਨੂੰ ਟੈਗ ਕਰਦੇ ਹੋਏ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਲਿਖਿਆ ਕਿ ਯਾਤਰੀਆਂ ਨਾਲ ਅਜਿਹਾ ਮਾੜਾ ਵਿਵਹਾਰ ਸਿੱਧਾ ਧੋਖਾ ਹੈ ਅਤੇ ਅਜਿਹੇ ਸਟਾਫ਼ ਨੂੰ ਤੁਰੰਤ ਮੁਅੱਤਲ ਕਰਨਾ ਚਾਹੀਦਾ ਹੈ।

DRM ਫਿਰੋਜ਼ਪੁਰ ਦਾ ਐਕਸ਼ਨ

ਸ਼ਿਕਾਇਤ ਦਾ ਨੋਟਿਸ ਲੈਂਦਿਆਂ ਫਿਰੋਜ਼ਪੁਰ ਡਿਵੀਜ਼ਨ ਦੇ DRM ਨੇ ਤੁਰੰਤ ਜਵਾਬ ਦਿੱਤਾ। ਉਨ੍ਹਾਂ ਕਿਹਾ:

ਰੇਲਵੇ ਨੇ ਯਾਤਰੀ ਨੂੰ ਹੋਈ ਅਸੁਵਿਧਾ ਲਈ ਅਫ਼ਸੋਸ ਜਤਾਇਆ ਹੈ। ਮਾਮਲੇ ਦੀ ਉੱਚ ਪੱਧਰੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।  DRM ਨੇ ਸਪੱਸ਼ਟ ਕੀਤਾ ਕਿ ਕਿਸੇ ਵੀ ਕਰਮਚਾਰੀ ਨੂੰ ਯਾਤਰੀਆਂ ਨਾਲ ਬਦਸਲੂਕੀ ਕਰਨ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ।

ਡਿਜੀਟਲ ਇੰਡੀਆ ਦੇ ਦੌਰ ਵਿੱਚ ਰੇਲਵੇ ਕਾਊਂਟਰਾਂ 'ਤੇ ਆਨਲਾਈਨ ਭੁਗਤਾਨ ਦੀ ਘਾਟ ਅਤੇ ਮੁਲਾਜ਼ਮਾਂ ਦਾ ਅਜਿਹਾ ਵਤੀਰਾ ਰੇਲਵੇ ਦੀ ਸਾਖ 'ਤੇ ਸਵਾਲੀਆ ਨਿਸ਼ਾਨ ਖੜ੍ਹੇ ਕਰਦਾ ਹੈ।