ਤਾਜਾ ਖਬਰਾਂ
ਜਲੰਧਰ ਦੀ 19 ਸਾਲਾ ਯਸ਼ਿਕਾ ਸ਼ਰਮਾ ਨੇ ਗਲੈਮਰ ਦੀ ਦੁਨੀਆ ਵਿੱਚ ਪੰਜਾਬ ਦਾ ਨਾਂ ਰੌਸ਼ਨ ਕਰਦਿਆਂ 'ਫੈਮਿਨਾ ਮਿਸ ਇੰਡੀਆ ਨੌਰਥ' ਦਾ ਵੱਕਾਰੀ ਖ਼ਿਤਾਬ ਆਪਣੇ ਨਾਂ ਕਰ ਲਿਆ ਹੈ। ਦੇਸ਼ ਦੇ 30 ਵੱਖ-ਵੱਖ ਰਾਜਾਂ ਦੀਆਂ ਪ੍ਰਤੀਯੋਗੀਆਂ ਨੂੰ ਪਛਾੜਦਿਆਂ ਯਸ਼ਿਕਾ ਨੇ ਉੱਤਰੀ ਭਾਰਤ ਦੀ ਨੁਮਾਇੰਦਗੀ ਕਰਕੇ ਇਹ ਮੁਕਾਮ ਹਾਸਲ ਕੀਤਾ। ਇਸ ਉਪਲਬਧੀ ਤੋਂ ਬਾਅਦ ਹੁਣ ਯਸ਼ਿਕਾ 'ਮਿਸ ਇੰਡੀਆ' ਦੇ ਮੁੱਖ ਖ਼ਿਤਾਬ ਲਈ ਮੈਦਾਨ ਵਿੱਚ ਨਿੱਤਰੇਗੀ।
ਯਸ਼ਿਕਾ ਨੇ ਆਪਣੀ ਸਫਲਤਾ ਦਾ ਸਫ਼ਰ ਯਾਦ ਕਰਦਿਆਂ ਦੱਸਿਆ ਕਿ ਉਸ ਨੇ ਮਹਿਜ਼ 13 ਸਾਲ ਦੀ ਨਿੱਕੀ ਉਮਰ ਵਿੱਚ ਮਾਡਲਿੰਗ ਦੀ ਦੁਨੀਆ ਵਿੱਚ ਕਦਮ ਰੱਖਿਆ ਸੀ। ਉਸੇ ਸਾਲ 'ਮਿਸ ਜਲੰਧਰ' ਦਾ ਖ਼ਿਤਾਬ ਜਿੱਤ ਕੇ ਉਸ ਨੇ ਆਪਣੀ ਕਾਬਲੀਅਤ ਦਾ ਲੋਹਾ ਮਨਵਾਇਆ ਸੀ। ਯਸ਼ਿਕਾ ਮੁਤਾਬਕ, ਮਾਡਲਿੰਗ ਉਸ ਲਈ ਸਿਰਫ਼ ਇੱਕ ਸ਼ੌਕ ਨਹੀਂ ਬਲਕਿ ਇੱਕ ਪੇਸ਼ਾ ਹੈ, ਜਿਸ ਲਈ ਉਸ ਨੇ ਆਪਣੀ ਪੜ੍ਹਾਈ ਦੇ ਨਾਲ-ਨਾਲ ਸਖ਼ਤ ਮਿਹਨਤ ਜਾਰੀ ਰੱਖੀ ਹੈ।
ਯਸ਼ਿਕਾ ਦੀ ਇਸ ਪ੍ਰਾਪਤੀ ਤੋਂ ਬਾਅਦ ਉਸ ਦੇ ਘਰ ਸ਼ੁਭਚਿੰਤਕਾਂ ਦਾ ਹੜ੍ਹ ਆ ਗਿਆ ਹੈ। ਉਸ ਦੀ ਮਾਤਾ ਸਵੀਟੀ ਨੇ ਭਾਵੁਕ ਹੁੰਦਿਆਂ ਕਿਹਾ ਕਿ ਪੂਰਾ ਪਰਿਵਾਰ ਆਪਣੀ ਧੀ ਦੀ ਮਿਹਨਤ 'ਤੇ ਮਾਣ ਮਹਿਸੂਸ ਕਰ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਪਰਿਵਾਰ ਨੇ ਹਮੇਸ਼ਾ ਯਸ਼ਿਕਾ ਦੇ ਸੁਪਨਿਆਂ ਦਾ ਸਮਰਥਨ ਕੀਤਾ ਹੈ ਅਤੇ ਭਵਿੱਖ ਦੀਆਂ ਚੁਣੌਤੀਆਂ ਵਿੱਚ ਵੀ ਉਹ ਉਸ ਦੇ ਨਾਲ ਚਟਾਨ ਵਾਂਗ ਖੜ੍ਹੇ ਰਹਿਣਗੇ।
ਆਪਣੇ ਭਵਿੱਖ ਦੇ ਟੀਚਿਆਂ ਬਾਰੇ ਗੱਲ ਕਰਦਿਆਂ ਯਸ਼ਿਕਾ ਨੇ ਕਿਹਾ ਕਿ ਇਹ ਚੁਣੌਤੀਪੂਰਨ ਯਾਤਰਾ ਅਜੇ ਸ਼ੁਰੂ ਹੋਈ ਹੈ। ਉਸ ਦਾ ਅੰਤਮ ਸੁਪਨਾ 'ਮਿਸ ਇੰਡੀਆ' ਬਣਨ ਤੋਂ ਬਾਅਦ 'ਮਿਸ ਵਰਲਡ' ਦਾ ਤਾਜ ਜਿੱਤ ਕੇ ਅੰਤਰਰਾਸ਼ਟਰੀ ਪੱਧਰ 'ਤੇ ਭਾਰਤ ਦਾ ਮਾਣ ਵਧਾਉਣਾ ਹੈ। ਯਸ਼ਿਕਾ ਦੀ ਇਸ ਸਫਲਤਾ ਨੇ ਪੰਜਾਬ ਦੀਆਂ ਹੋਰਨਾਂ ਮੁਟਿਆਰਾਂ ਲਈ ਵੀ ਪ੍ਰੇਰਨਾ ਦੇ ਰਾਹ ਖੋਲ੍ਹ ਦਿੱਤੇ ਹਨ।
Get all latest content delivered to your email a few times a month.
