ਜਲੰਧਰ 'ਚ ਖ਼ੂਨੀ ਝੜਪ: ਨੌਜਵਾਨ 'ਤੇ ਕਿਰਪਾਨਾਂ ਨਾਲ ਜਾਨਲੇਵਾ ਹਮਲਾ; ਵਫ਼ਾਦਾਰ ਕੁੱਤੇ ਨੇ ਹਮਲਾਵਰ ਨੂੰ ਭਜਾ ਕੇ ਬਚਾਈ ਜਾਨ

ਜਲੰਧਰ : ਸ਼ਹਿਰ ਦੇ ਗੜ੍ਹਾ ਖੇਤਰ ਅਧੀਨ ਪੈਂਦੇ ਵਾਲਮੀਕਿ ਮੁਹੱਲੇ ਵਿੱਚ ਦੋ ਧਿਰਾਂ ਵਿਚਾਲੇ ਹੋਈ ਮਾਮੂਲੀ ਤਕਰਾਰ ਨੇ ਹਿੰਸਕ ਰੂਪ ਧਾਰਨ ਕਰ ਲਿਆ। ਇਸ ਖ਼ੂਨੀ ਟਕਰਾਅ ਦੌਰਾਨ ਹਮਲਾਵਰਾਂ ਨੇ ਇੱਕ ਨੌਜਵਾਨ ਨੂੰ ਘੇਰ ਕੇ ਉਸ 'ਤੇ ਤੇਜ਼ਧਾਰ ਕਿਰਪਾਨਾਂ ਨਾਲ ਤਾਬੜਤੋੜ ਹਮਲਾ ਕਰ ਦਿੱਤਾ, ਜਿਸ ਕਾਰਨ ਉਹ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਿਆ। ਹਾਲਾਂਕਿ, ਇਸ ਰੂਹ ਕੰਬਾਊ ਘਟਨਾ ਦੌਰਾਨ ਇੱਕ ਅਨੋਖੀ ਤੇ ਦਲੇਰਾਨਾ ਮਿਸਾਲ ਵੀ ਸਾਹਮਣੇ ਆਈ, ਜਿੱਥੇ ਮੌਕੇ 'ਤੇ ਮੌਜੂਦ ਇੱਕ ਵਫ਼ਾਦਾਰ ਕੁੱਤੇ ਨੇ ਹਮਲਾਵਰ ਨਾਲ ਭਿੜ ਕੇ ਪੀੜਤ ਦੀ ਜਾਨ ਬਚਾ ਲਈ। ਪੂਰੀ ਵਾਰਦਾਤ ਇਲਾਕੇ ਵਿੱਚ ਲੱਗੇ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਈ ਹੈ।

ਮਿਲੀ ਜਾਣਕਾਰੀ ਮੁਤਾਬਕ, ਗਲੀ 'ਚੋਂ ਲੰਘ ਰਹੇ ਨੌਜਵਾਨ ਨੂੰ ਇਕੱਲਾ ਵੇਖ ਕੇ ਮੁਲਜ਼ਮਾਂ ਨੇ ਅਚਾਨਕ ਉਸ 'ਤੇ ਧਾਵਾ ਬੋਲ ਦਿੱਤਾ। ਪਹਿਲਾਂ ਤਾਂ ਕਈ ਨੌਜਵਾਨਾਂ ਨੇ ਮਿਲ ਕੇ ਪੀੜਤ ਦੀ ਲੱਤਾਂ-ਮੁੱਕਿਆਂ ਨਾਲ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ। ਇਸ ਤੋਂ ਬਾਅਦ ਜਦੋਂ ਮੁਲਜ਼ਮਾਂ ਦਾ ਮਨ ਨਾ ਭਰਿਆ, ਤਾਂ ਇੱਕ ਹਮਲਾਵਰ ਹੱਥ 'ਚ ਕਿਰਪਾਨ ਲੈ ਕੇ ਆਇਆ ਅਤੇ ਨੌਜਵਾਨ 'ਤੇ ਲਗਾਤਾਰ ਵਾਰ ਕਰਨੇ ਸ਼ੁਰੂ ਕਰ ਦਿੱਤੇ।

ਜਦੋਂ ਹਮਲਾਵਰ ਨੌਜਵਾਨ 'ਤੇ ਜਾਨਲੇਵਾ ਵਾਰ ਕਰ ਰਿਹਾ ਸੀ, ਤਾਂ ਉੱਥੇ ਮੌਜੂਦ ਇੱਕ ਕੁੱਤਾ ਬਿਨਾਂ ਆਪਣੀ ਜਾਨ ਦੀ ਪਰਵਾਹ ਕੀਤੇ ਜ਼ਖ਼ਮੀ ਨੌਜਵਾਨ ਦੀ ਮਦਦ ਲਈ ਅੱਗੇ ਆਇਆ। ਕੁੱਤੇ ਨੇ ਹਮਲਾਵਰ 'ਤੇ ਛਾਲਾਂ ਮਾਰ ਕੇ ਅਤੇ ਲਗਾਤਾਰ ਭੌਂਕ ਕੇ ਉਸ ਨੂੰ ਉਲਝਾ ਲਿਆ। ਕੁੱਤੇ ਦੇ ਇਸ ਅਚਾਨਕ ਕੀਤੇ ਵਿਰੋਧ ਤੋਂ ਹਮਲਾਵਰ ਬੁਰਾ ਘਬਰਾ ਗਿਆ ਅਤੇ ਖ਼ੁਦ ਨੂੰ ਬਚਾਉਂਦਾ ਹੋਇਆ ਕਿਰਪਾਨ ਲਹਿਰਾਉਂਦਾ ਮੌਕੇ ਤੋਂ ਫ਼ਰਾਰ ਹੋ ਗਿਆ। ਪ੍ਰਤੱਖਦਰਸ਼ੀਆਂ ਅਨੁਸਾਰ ਜੇਕਰ ਕੁੱਤਾ ਸਮੇਂ ਸਿਰ ਦਖ਼ਲ ਨਾ ਦਿੰਦਾ ਤਾਂ ਜਾਨੀ ਨੁਕਸਾਨ ਹੋਰ ਵੀ ਵੱਡਾ ਹੋ ਸਕਦਾ ਸੀ।

ਹਮਲੇ ਵਿੱਚ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋਇਆ ਨੌਜਵਾਨ ਲਹੂ-ਲੁਹਾਣ ਹਾਲਤ ਵਿੱਚ ਜ਼ਮੀਨ 'ਤੇ ਡਿੱਗ ਪਿਆ। ਘਟਨਾ ਤੋਂ ਤੁਰੰਤ ਬਾਅਦ ਸਥਾਨਕ ਲੋਕਾਂ ਅਤੇ ਪਰਿਵਾਰਕ ਮੈਂਬਰਾਂ ਨੇ ਉਸ ਨੂੰ ਨਜ਼ਦੀਕੀ ਹਸਪਤਾਲ ਪਹੁੰਚਾਇਆ, ਜਿੱਥੇ ਉਸ ਦੀ ਹਾਲਤ ਨਾਜ਼ੁਕ ਦੱਸੀ ਜਾ ਰਹੀ ਹੈ। ਦੂਜੇ ਪਾਸੇ, ਸੂਚਨਾ ਮਿਲਦੇ ਹੀ ਪੁਲਿਸ ਨੇ ਮੌਕੇ 'ਤੇ ਪਹੁੰਚ ਕੇ ਸੀਸੀਟੀਵੀ ਫੁਟੇਜ ਨੂੰ ਆਪਣੇ ਕਬਜ਼ੇ 'ਚ ਲੈ ਲਿਆ ਹੈ ਅਤੇ ਮੁਲਜ਼ਮਾਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।