ਤਾਜਾ ਖਬਰਾਂ
ਏਸ਼ੀਆ ਕੱਪ 2025 ਵਿੱਚ ਭਾਰਤ ਅਤੇ ਪਾਕਿਸਤਾਨ ਦਾ ਟਕਰਾਅ ਖੇਡ ਤੋਂ ਇਲਾਵਾ ਵਿਵਾਦਾਂ ਕਰਕੇ ਵੀ ਖਬਰਾਂ ਵਿੱਚ ਛਾਇਆ ਹੋਇਆ ਹੈ। ਗਰੁੱਪ ਮੈਚ ਤੋਂ ਬਾਅਦ ਭਾਰਤੀ ਖਿਡਾਰੀਆਂ ਵੱਲੋਂ ਪਾਕਿਸਤਾਨੀ ਟੀਮ ਨਾਲ ਹੱਥ ਨਾ ਮਿਲਾਉਣ ਦੀ ਘਟਨਾ ਨੇ ਦੋਵੇਂ ਦੇਸ਼ਾਂ ਵਿੱਚ ਤਣਾਅ ਪੈਦਾ ਕਰ ਦਿੱਤਾ। ਪਾਕਿਸਤਾਨ ਨੇ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਟੂਰਨਾਮੈਂਟ ਬਾਈਕਾਟ ਕਰਨ ਤੱਕ ਦੀ ਚੇਤਾਵਨੀ ਦਿੱਤੀ, ਜਿਸ ਕਾਰਨ ਯੂਏਈ ਵਿਰੁੱਧ ਉਸਦਾ ਮੈਚ ਵੀ ਦੇਰੀ ਨਾਲ ਸ਼ੁਰੂ ਹੋਇਆ। ਹੁਣ, ਜਦੋਂ ਇਹ ਮਾਮਲਾ ਪੂਰੀ ਤਰ੍ਹਾਂ ਠੰਡਾ ਵੀ ਨਹੀਂ ਪਿਆ, ਤਦੋਂ ਦੋਵੇਂ ਟੀਮਾਂ ਫਿਰ ਇੱਕ ਦੂਜੇ ਦੇ ਮੁਕਾਬਲੇ ਆਉਣ ਜਾ ਰਹੀਆਂ ਹਨ।
ਸੁਪਰ-4 ‘ਚ ਭਾਰਤ-ਪਾਕਿਸਤਾਨ ਮੁਕਾਬਲਾ
ਗਰੁੱਪ ਏ ਤੋਂ ਭਾਰਤ ਅਤੇ ਪਾਕਿਸਤਾਨ ਦੋਵੇਂ ਹੀ ਸੁਪਰ-ਫੋਰ ਰਾਊਂਡ ਵਿੱਚ ਪਹੁੰਚ ਗਏ ਹਨ। ਦੋਵਾਂ ਟੀਮਾਂ ਦਾ ਅਗਲਾ ਮੁਕਾਬਲਾ 21 ਸਤੰਬਰ ਨੂੰ ਦੁਬਈ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ ‘ਚ ਖੇਡਿਆ ਜਾਣਾ ਹੈ। ਭਾਰਤੀ ਟੀਮ ਨੇ ਗਰੁੱਪ ਮੈਚਾਂ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ ਅਤੇ ਆਪਣੇ ਦੋਵੇਂ ਮੈਚ ਜਿੱਤ ਕੇ ਟੇਬਲ ‘ਚ ਸਿਖਰ ‘ਤੇ ਕਾਇਮ ਹੈ।
ਪਾਕਿਸਤਾਨ ਨੇ ਆਪਣੇ ਤਿੰਨ ਮੈਚਾਂ ਵਿੱਚੋਂ ਦੋ ਜਿੱਤੇ ਅਤੇ ਇੱਕ ਗਵਾਇਆ, ਜਿਸ ਨਾਲ ਉਹ ਚਾਰ ਅੰਕਾਂ ਨਾਲ ਗਰੁੱਪ ਵਿੱਚ ਦੂਜੇ ਨੰਬਰ ‘ਤੇ ਰਿਹਾ। ਦੂਜੇ ਪਾਸੇ, ਯੂਏਈ ਆਪਣੀ ਖਰਾਬ ਪ੍ਰਦਰਸ਼ਨ ਕਰਕੇ ਟੂਰਨਾਮੈਂਟ ਤੋਂ ਬਾਹਰ ਹੋ ਗਿਆ ਹੈ। ਓਮਾਨ ਦੀ ਟੀਮ ਵੀ ਦੌੜ ਤੋਂ ਪਹਿਲਾਂ ਹੀ ਬਾਹਰ ਹੋ ਗਈ ਹੈ, ਭਾਵੇਂ ਉਸਦਾ ਇੱਕ ਮੈਚ ਭਾਰਤ ਖ਼ਿਲਾਫ਼ ਬਾਕੀ ਹੈ।
ਪਿਛਲਾ ਟਕਰਾਅ ਭਾਰਤ ਦੇ ਨਾਮ
ਗਰੁੱਪ ਸਟੇਜ ਵਿੱਚ ਭਾਰਤ ਨੇ ਪਾਕਿਸਤਾਨ ਨੂੰ ਇਕ-ਤਰਫ਼ਾ ਢੰਗ ਨਾਲ ਹਰਾਇਆ ਸੀ। ਪਾਕਿਸਤਾਨ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਕੇਵਲ 127 ਦੌੜਾਂ ਦਾ ਹੀ ਟੀਚਾ ਦਿੱਤਾ ਸੀ, ਜਿਸਨੂੰ ਟੀਮ ਇੰਡੀਆ ਨੇ 15.5 ਓਵਰਾਂ ਵਿੱਚ ਤਿੰਨ ਵਿਕਟਾਂ ਦੇ ਨੁਕਸਾਨ ‘ਤੇ ਆਸਾਨੀ ਨਾਲ ਹਾਸਲ ਕਰ ਲਿਆ। ਇਸ ਪ੍ਰਦਰਸ਼ਨ ਦੇ ਆਧਾਰ ‘ਤੇ ਅਗਲੇ ਮੁਕਾਬਲੇ ਵਿੱਚ ਵੀ ਟੀਮ ਇੰਡੀਆ ਮਜ਼ਬੂਤ ਨਜ਼ਰ ਆ ਰਹੀ ਹੈ।
Get all latest content delivered to your email a few times a month.
