ਤਾਜਾ ਖਬਰਾਂ
ਬਿਹਾਰ ਦੇ ਜਮੁਈ ਜ਼ਿਲ੍ਹੇ ਵਿੱਚ ਸ਼ਨੀਵਾਰ ਦੇਰ ਰਾਤ ਇੱਕ ਵੱਡਾ ਰੇਲ ਹਾਦਸਾ ਵਾਪਰ ਗਿਆ, ਜਿਸ ਨਾਲ ਦਿੱਲੀ-ਹਾਵੜਾ ਮੁੱਖ ਰੇਲ ਮਾਰਗ 'ਤੇ ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਗਈ। ਇਹ ਹਾਦਸਾ ਆਸਨਸੋਲ ਰੇਲਵੇ ਡਿਵੀਜ਼ਨ ਦੇ ਅਧੀਨ ਤੇਲਵਾ ਬਾਜ਼ਾਰ ਹਾਲਟ ਨੇੜੇ ਵਾਪਰਿਆ, ਜਿੱਥੇ ਜਸੀਡੀਹ ਤੋਂ ਝਾਝਾ ਵੱਲ ਜਾ ਰਹੀ ਸੀਮੈਂਟ ਨਾਲ ਲੱਦੀ ਮਾਲ ਗੱਡੀ ਦੇ 12 ਡੱਬੇ ਅਚਾਨਕ ਪਟੜੀ ਤੋਂ ਉਤਰ ਗਏ।
ਪਟੜੀ ਤੋਂ ਉਤਰੇ ਡੱਬਿਆਂ ਵਿੱਚੋਂ ਤਿੰਨ ਡੱਬੇ ਬੜੂਆ ਨਦੀ ਦੇ ਪੁਲ ਤੋਂ ਹੇਠਾਂ ਡਿੱਗ ਗਏ, ਜਦਕਿ ਬਾਕੀ ਕਈ ਡੱਬੇ ਇੱਕ-ਦੂਜੇ ਨਾਲ ਟਕਰਾ ਕੇ ਕੁਚਲ ਗਏ। ਹਾਦਸਾ ਰਾਤ ਕਰੀਬ 11:30 ਵਜੇ ਪੁਲ ਨੰਬਰ 676 ਅਤੇ ਪੋਲ ਨੰਬਰ 344/18 ਦੇ ਨੇੜੇ ਵਾਪਰਿਆ। ਮਾਲ ਗੱਡੀ ਵਿੱਚ ਭਾਰੀ ਮਾਤਰਾ ਵਿੱਚ ਸੀਮੈਂਟ ਲੱਦਿਆ ਹੋਇਆ ਸੀ, ਜੋ ਹਾਦਸੇ ਤੋਂ ਬਾਅਦ ਆਲੇ-ਦੁਆਲੇ ਖੇਤਰ ਵਿੱਚ ਖਿੰਡ ਗਿਆ।
ਇਸ ਘਟਨਾ ਕਾਰਨ ਜਸੀਡੀਹ-ਝਾਝਾ ਸੈਕਸ਼ਨ ਦੀਆਂ ਅੱਪ ਅਤੇ ਡਾਊਨ ਦੋਵਾਂ ਲਾਈਨਾਂ ਪੂਰੀ ਤਰ੍ਹਾਂ ਪ੍ਰਭਾਵਿਤ ਹੋ ਗਈਆਂ, ਜਿਸ ਨਾਲ ਕਈ ਯਾਤਰੀ ਅਤੇ ਮਾਲ ਗੱਡੀਆਂ ਨੂੰ ਰੋਕਣਾ ਜਾਂ ਮੋੜਣਾ ਪਿਆ। ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਰੇਲਵੇ ਪੁਲਿਸ, ਆਰਪੀਐਫ ਅਤੇ ਤਕਨੀਕੀ ਟੀਮਾਂ ਮੌਕੇ 'ਤੇ ਪਹੁੰਚ ਗਈਆਂ।
ਰਾਹਤ ਦੀ ਗੱਲ ਇਹ ਰਹੀ ਕਿ ਇਸ ਵੱਡੇ ਹਾਦਸੇ ਵਿੱਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ। ਹਾਲਾਂਕਿ, ਰਾਤ ਦਾ ਸਮਾਂ ਅਤੇ ਸੰਘਣੀ ਧੁੰਦ ਹੋਣ ਕਾਰਨ ਬਹਾਲੀ ਕਾਰਜਾਂ ਵਿੱਚ ਦੇਰੀ ਹੋ ਰਹੀ ਹੈ। ਸੀਨੀਅਰ ਰੇਲਵੇ ਅਧਿਕਾਰੀਆਂ ਦੇ ਮੌਕੇ 'ਤੇ ਪਹੁੰਚਣ ਤੋਂ ਬਾਅਦ ਹੀ ਬਚਾਅ ਅਤੇ ਟਰੈਕ ਬਹਾਲੀ ਦਾ ਕੰਮ ਪੂਰੀ ਰਫ਼ਤਾਰ ਨਾਲ ਸ਼ੁਰੂ ਹੋਣ ਦੀ ਉਮੀਦ ਹੈ।
Get all latest content delivered to your email a few times a month.
