ਹਵਾਈ ਅੱਡਿਆਂ 'ਤੇ ਤਕਨੀਕੀ 'ਗ੍ਰਹਿਣ', ਨੇਵੀਟੇਅਰ ਸਰਵਰ ਫੇਲ੍ਹ ਹੋਣ ਕਾਰਨ ਉਡਾਣਾਂ ਪ੍ਰਭਾਵਿਤ

ਬੁੱਧਵਾਰ ਦੀ ਸਵੇਰ ਦੇਸ਼ ਦੇ ਪ੍ਰਮੁੱਖ ਹਵਾਈ ਅੱਡਿਆਂ 'ਤੇ ਹਜ਼ਾਰਾਂ ਯਾਤਰੀਆਂ ਲਈ ਭਾਰੀ ਪ੍ਰੇਸ਼ਾਨੀ ਲੈ ਕੇ ਆਈ। ਏਅਰਲਾਈਨ ਬੁਕਿੰਗ ਅਤੇ ਚੈੱਕ-ਇਨ ਸਿਸਟਮ ਨੂੰ ਸੰਭਾਲਣ ਵਾਲੀ ਗਲੋਬਲ ਕੰਪਨੀ 'ਨੇਵੀਟੇਅਰ' (Navitaire) ਦਾ ਸਰਵਰ ਅਚਾਨਕ ਕਰੈਸ਼ ਹੋਣ ਕਾਰਨ ਹਵਾਈ ਅੱਡਿਆਂ 'ਤੇ ਹਫੜਾ-ਦਫੜੀ ਮਚ ਗਈ। ਹਾਲਾਂਕਿ ਇਹ ਖਰਾਬੀ ਕਰੀਬ 43 ਮਿੰਟ (ਸਵੇਰੇ 6:45 ਤੋਂ 7:28 ਵਜੇ ਤੱਕ) ਰਹੀ, ਪਰ ਸਵੇਰ ਦੇ ਭੀੜ-ਭੜੱਕੇ ਵਾਲੇ ਸਮੇਂ ਕਾਰਨ ਇਸ ਦਾ ਅਸਰ ਦਿਨ ਭਰ ਦੀਆਂ ਉਡਾਣਾਂ 'ਤੇ ਦੇਖਣ ਨੂੰ ਮਿਲਿਆ।

ਮੈਨੂਅਲ ਚੈੱਕ-ਇਨ ਨੇ ਵਧਾਈ ਮੁਸੀਬਤ

ਸਰਵਰ ਠੱਪ ਹੋਣ ਕਾਰਨ ਆਟੋਮੈਟਿਕ ਸਿਸਟਮ ਨੇ ਕੰਮ ਕਰਨਾ ਬੰਦ ਕਰ ਦਿੱਤਾ ਸੀ। ਦਿੱਲੀ ਹਵਾਈ ਅੱਡੇ ਦੇ ਟਰਮੀਨਲ-3 'ਤੇ ਸਥਿਤੀ ਸਭ ਤੋਂ ਨਾਜ਼ੁਕ ਰਹੀ, ਜਿੱਥੇ ਏਅਰਲਾਈਨ ਸਟਾਫ਼ ਨੂੰ ਮਜਬੂਰਨ 'ਹੱਥੀਂ' (ਮੈਨੂਅਲ) ਐਂਟਰੀਆਂ ਕਰਨੀਆਂ ਪਈਆਂ। ਇਸ ਹੌਲੀ ਪ੍ਰਕਿਰਿਆ ਕਾਰਨ ਚੈੱਕ-ਇਨ ਕਾਊਂਟਰਾਂ 'ਤੇ ਯਾਤਰੀਆਂ ਦੀਆਂ ਸੈਂਕੜੇ ਮੀਟਰ ਲੰਬੀਆਂ ਲਾਈਨਾਂ ਲੱਗ ਗਈਆਂ। ਕਈ ਯਾਤਰੀਆਂ ਨੇ ਸੋਸ਼ਲ ਮੀਡੀਆ ਰਾਹੀਂ ਆਪਣਾ ਗੁੱਸਾ ਜ਼ਾਹਰ ਕਰਦਿਆਂ ਦੱਸਿਆ ਕਿ ਦੇਰੀ ਕਾਰਨ ਉਨ੍ਹਾਂ ਦੀਆਂ ਜ਼ਰੂਰੀ ਉਡਾਣਾਂ ਖੁੰਝ ਗਈਆਂ।

ਕਈ ਵੱਡੀਆਂ ਏਅਰਲਾਈਨਾਂ ਹੋਈਆਂ ਪ੍ਰਭਾਵਿਤ

ਇਸ ਤਕਨੀਕੀ ਨੁਕਸ ਨੇ ਦੇਸ਼ ਦੀਆਂ ਪ੍ਰਮੁੱਖ ਏਅਰਲਾਈਨਾਂ—ਇੰਡੀਗੋ, ਅਕਾਸਾ ਏਅਰ, ਸਪਾਈਸਜੈੱਟ ਅਤੇ ਏਅਰ ਇੰਡੀਆ ਦੀਆਂ ਸੇਵਾਵਾਂ ਨੂੰ ਸਿੱਧੇ ਤੌਰ 'ਤੇ ਪ੍ਰਭਾਵਿਤ ਕੀਤਾ। ਨੇਵੀਟੇਅਰ ਸਿਸਟਮ ਬੰਦ ਹੋਣ ਦਾ ਮਤਲਬ ਹੈ ਕਿ ਏਅਰਲਾਈਨਾਂ ਨਾ ਤਾਂ ਨਵੀਂ ਬੁਕਿੰਗ ਪ੍ਰੋਸੈਸ ਕਰ ਸਕਦੀਆਂ ਹਨ ਅਤੇ ਨਾ ਹੀ ਯਾਤਰੀਆਂ ਨੂੰ ਬੋਰਡਿੰਗ ਪਾਸ ਜਾਰੀ ਕਰ ਸਕਦੀਆਂ ਹਨ। ਇਸ ਕਾਰਨ ਦਿੱਲੀ, ਮੁੰਬਈ ਅਤੇ ਬੰਗਲੁਰੂ ਤੋਂ ਉਡਾਣ ਭਰਨ ਵਾਲੀਆਂ ਦਰਜਨਾਂ ਫਲਾਈਟਾਂ ਆਪਣੇ ਨਿਰਧਾਰਿਤ ਸਮੇਂ ਤੋਂ ਪੱਛੜ ਗਈਆਂ।

ਪੁਰਾਣੀਆਂ ਯਾਦਾਂ ਹੋਈਆਂ ਤਾਜ਼ਾ

ਇਹ ਕੋਈ ਪਹਿਲਾ ਮੌਕਾ ਨਹੀਂ ਹੈ ਜਦੋਂ ਤਕਨੀਕੀ ਖਰਾਬੀ ਨੇ ਹਵਾਈ ਸਫ਼ਰ ਨੂੰ ਰੋਕਿਆ ਹੋਵੇ। ਪਿਛਲੇ ਸਾਲ ਨਵੰਬਰ ਵਿੱਚ ਵੀ ਦਿੱਲੀ ਹਵਾਈ ਅੱਡੇ 'ਤੇ ਆਟੋਮੈਟਿਕ ਮੈਸੇਜ ਸਵਿਚਿੰਗ ਸਿਸਟਮ (AMSS) ਵਿੱਚ ਨੁਕਸ ਪੈਣ ਕਾਰਨ 800 ਤੋਂ ਵੱਧ ਉਡਾਣਾਂ ਪ੍ਰਭਾਵਿਤ ਹੋਈਆਂ ਸਨ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਡਿਜੀਟਲ ਸਿਸਟਮ 'ਤੇ ਵਧਦੀ ਨਿਰਭਰਤਾ ਕਾਰਨ ਅਜਿਹੀਆਂ ਛੋਟੀਆਂ ਤਕਨੀਕੀ ਖਰਾਬੀਆਂ ਵੀ ਪੂਰੇ ਦੇਸ਼ ਦੇ ਹਵਾਈ ਨੈੱਟਵਰਕ ਨੂੰ ਹਿਲਾ ਕੇ ਰੱਖ ਦਿੰਦੀਆਂ ਹਨ।

ਸਵੇਰੇ ਸਾਢੇ ਸੱਤ ਵਜੇ ਤੋਂ ਬਾਅਦ ਸੇਵਾਵਾਂ ਹੌਲੀ-ਹੌਲੀ ਬਹਾਲ ਹੋਣੀਆਂ ਸ਼ੁਰੂ ਹੋਈਆਂ, ਪਰ ਕਈ ਘੰਟਿਆਂ ਤੱਕ ਯਾਤਰੀਆਂ ਨੂੰ ਅਸੁਵਿਧਾ ਦਾ ਸਾਹਮਣਾ ਕਰਨਾ ਪਿਆ।