ਤਾਜਾ ਖਬਰਾਂ
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਆਪਣੇ ਕਾਰਜਕਾਲ ਦਾ ਇੱਕ ਸਾਲ ਪੂਰਾ ਹੋਣ 'ਤੇ ਆਪਣੀਆਂ ਪ੍ਰਾਪਤੀਆਂ ਦੀ ਜੰਮ ਕੇ ਤਾਰੀਫ਼ ਕੀਤੀ ਹੈ। 'ਸਟੇਟ ਆਫ਼ ਦਾ ਯੂਨੀਅਨ-2026' ਵਿੱਚ ਬੋਲਦਿਆਂ ਟਰੰਪ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਦੇ ਪ੍ਰਸ਼ਾਸਨ ਨੇ ਮਹਿਜ਼ 12 ਮਹੀਨਿਆਂ ਵਿੱਚ ਉਹ ਬਦਲਾਅ ਕਰ ਵਿਖਾਏ ਹਨ ਜੋ ਸਦੀਆਂ ਵਿੱਚ ਹੁੰਦੇ ਹਨ। ਉਨ੍ਹਾਂ ਨੇ ਮੌਜੂਦਾ ਦੌਰ ਨੂੰ ਅਮਰੀਕਾ ਦਾ 'ਗੋਲਡਨ ਏਜ' (ਸੁਨਹਿਰੀ ਯੁੱਗ) ਕਰਾਰ ਦਿੱਤਾ।
"ਵਿਰਾਸਤ ਵਿੱਚ ਮਿਲਿਆ ਸੀ ਸੰਕਟਾਂ ਨਾਲ ਘਿਰਿਆ ਦੇਸ਼"
ਟਰੰਪ ਨੇ ਪਿਛਲੀ ਸਰਕਾਰ 'ਤੇ ਨਿਸ਼ਾਨਾ ਸਾਧਦੇ ਹੋਏ ਕਿਹਾ, "ਜਦੋਂ ਮੈਂ ਇੱਕ ਸਾਲ ਪਹਿਲਾਂ ਸੱਤਾ ਸੰਭਾਲੀ ਸੀ, ਤਾਂ ਮੈਨੂੰ ਇੱਕ ਅਜਿਹਾ ਦੇਸ਼ ਮਿਲਿਆ ਜੋ ਸੰਕਟ ਵਿੱਚ ਸੀ। ਆਰਥਿਕਤਾ ਰੁਕੀ ਹੋਈ ਸੀ, ਮਹਿੰਗਾਈ ਰਿਕਾਰਡ ਪੱਧਰ 'ਤੇ ਸੀ ਅਤੇ ਸਰਹੱਦਾਂ ਪੂਰੀ ਤਰ੍ਹਾਂ ਖੁੱਲ੍ਹੀਆਂ ਸਨ। ਫੌਜ ਅਤੇ ਪੁਲਿਸ ਵਿੱਚ ਭਰਤੀ ਦੀ ਹਾਲਤ ਖਰਾਬ ਸੀ ਅਤੇ ਪੂਰੀ ਦੁਨੀਆ ਵਿੱਚ ਜੰਗਾਂ ਦਾ ਮਾਹੌਲ ਸੀ। ਪਰ ਅੱਜ ਮੈਂ ਮਾਣ ਨਾਲ ਕਹਿ ਸਕਦਾ ਹਾਂ ਕਿ ਅਸੀਂ ਸਦੀਆਂ ਦਾ ਬਦਲਾਅ ਮਹਿਜ਼ ਇੱਕ ਸਾਲ ਵਿੱਚ ਕਰ ਦਿੱਤਾ ਹੈ।"
ਤੇਲ ਉਤਪਾਦਨ ਅਤੇ 'ਡਰਿੱਲ ਬੇਬੀ ਡਰਿੱਲ' ਦਾ ਵਾਅਦਾ
ਊਰਜਾ ਖੇਤਰ ਬਾਰੇ ਗੱਲ ਕਰਦਿਆਂ ਟਰੰਪ ਨੇ ਕਿਹਾ:
ਉਨ੍ਹਾਂ ਨੇ 'ਡਰਿੱਲ ਬੇਬੀ ਡਰਿੱਲ' ਦੇ ਆਪਣੇ ਵਾਅਦੇ ਨੂੰ ਨਿਭਾਇਆ ਹੈ, ਜਿਸ ਕਾਰਨ ਕੁਦਰਤੀ ਗੈਸ ਦਾ ਉਤਪਾਦਨ ਉੱਚ ਪੱਧਰ 'ਤੇ ਪਹੁੰਚ ਗਿਆ ਹੈ।
ਨਿਰਮਾਣ ਖੇਤਰ ਵਿੱਚ 70,000 ਨਵੀਆਂ ਨੌਕਰੀਆਂ ਪੈਦਾ ਹੋਈਆਂ ਹਨ।
ਤੇਲ ਭੰਡਾਰ: ਅਮਰੀਕੀ ਤੇਲ ਉਤਪਾਦਨ ਵਿੱਚ ਰੋਜ਼ਾਨਾ 6 ਲੱਖ ਬੈਰਲ ਦਾ ਵਾਧਾ ਹੋਇਆ ਹੈ ਅਤੇ ਵੇਨੇਜ਼ੁਏਲਾ ਤੋਂ 8 ਕਰੋੜ ਬੈਰਲ ਤੋਂ ਵੱਧ ਤੇਲ ਪ੍ਰਾਪਤ ਕੀਤਾ ਗਿਆ ਹੈ।
ਆਰਥਿਕ ਸੁਧਾਰ: 18 ਟ੍ਰਿਲੀਅਨ ਡਾਲਰ ਦਾ ਨਿਵੇਸ਼
ਟਰੰਪ ਨੇ ਦਾਅਵਾ ਕੀਤਾ ਕਿ ਜਿੱਥੇ ਬਾਈਡਨ ਸਰਕਾਰ ਦੇ ਚਾਰ ਸਾਲਾਂ ਵਿੱਚ 1 ਟ੍ਰਿਲੀਅਨ ਡਾਲਰ ਤੋਂ ਵੀ ਘੱਟ ਨਿਵੇਸ਼ ਆਇਆ ਸੀ, ਉੱਥੇ ਹੀ ਉਨ੍ਹਾਂ ਦੇ ਇੱਕ ਸਾਲ ਦੇ ਕਾਰਜਕਾਲ ਵਿੱਚ ਦੁਨੀਆ ਭਰ ਤੋਂ 18 ਟ੍ਰਿਲੀਅਨ ਡਾਲਰ ਦੇ ਨਿਵੇਸ਼ ਦੇ ਵਾਅਦੇ ਮਿਲੇ ਹਨ। ਉਨ੍ਹਾਂ ਅੱਗੇ ਕਿਹਾ ਕਿ ਮਹਿੰਗਾਈ ਦਰ 1.7 ਫੀਸਦੀ ਤੱਕ ਡਿੱਗ ਗਈ ਹੈ, ਜੋ ਪਿਛਲੇ ਪੰਜ ਸਾਲਾਂ ਵਿੱਚ ਸਭ ਤੋਂ ਘੱਟ ਹੈ।
ਸਰਹੱਦਾਂ ਅਤੇ ਸੁਰੱਖਿਆ
ਟਰੰਪ ਅਨੁਸਾਰ ਪਿਛਲੇ ਨੌਂ ਮਹੀਨਿਆਂ ਵਿੱਚ ਕੋਈ ਵੀ ਗੈਰ-ਕਾਨੂੰਨੀ ਪ੍ਰਵਾਸੀ ਦੇਸ਼ ਵਿੱਚ ਦਾਖਲ ਨਹੀਂ ਹੋਇਆ।
ਸਰਹੱਦ ਤੋਂ ਘਾਤਕ ਨਸ਼ੇ 'ਫੈਂਟਾਨਿਲ' ਦੀ ਤਸਕਰੀ ਵਿੱਚ 56 ਫੀਸਦੀ ਦੀ ਗਿਰਾਵਟ ਆਈ ਹੈ ਅਤੇ ਕਤਲ ਦੀਆਂ ਦਰਾਂ 125 ਸਾਲਾਂ ਵਿੱਚ ਸਭ ਤੋਂ ਹੇਠਲੇ ਪੱਧਰ 'ਤੇ ਪਹੁੰਚ ਗਈਆਂ ਹਨ।
ਪੈਟਰੋਲ ਦੀ ਕੀਮਤ ਜੋ 6 ਡਾਲਰ ਪ੍ਰਤੀ ਗੈਲਨ ਸੀ, ਹੁਣ ਕਈ ਰਾਜਾਂ ਵਿੱਚ ਘਟ ਕੇ 1.85 ਤੋਂ 2.30 ਡਾਲਰ ਦੇ ਵਿਚਕਾਰ ਆ ਗਈ ਹੈ।
8 ਜੰਗਾਂ ਰੁਕਵਾਉਣ ਦਾ ਵੱਡਾ ਦਾਅਵਾ
ਵਿਦੇਸ਼ ਨੀਤੀ 'ਤੇ ਬੋਲਦਿਆਂ ਟਰੰਪ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੇ ਦੁਨੀਆ ਭਰ ਵਿੱਚ 8 ਜੰਗਾਂ ਰੁਕਵਾਈਆਂ ਹਨ। ਇਸ ਦੌਰਾਨ ਉਨ੍ਹਾਂ ਨੇ ਮੁੜ ਭਾਰਤ-ਪਾਕਿਸਤਾਨ ਜੰਗ ਰੁਕਵਾਉਣ ਦਾ ਦਾਅਵਾ ਕੀਤਾ। ਉਨ੍ਹਾਂ ਕਿਹਾ, "ਜੇਕਰ ਮੈਂ ਵਿਚੋਲਗੀ ਨਾ ਕਰਦਾ ਤਾਂ ਪ੍ਰਮਾਣੂ ਜੰਗ ਸ਼ੁਰੂ ਹੋ ਸਕਦੀ ਸੀ, ਜਿਸ ਵਿੱਚ 3.5 ਕਰੋੜ (35 ਮਿਲੀਅਨ) ਲੋਕ ਮਾਰੇ ਜਾਂਦੇ।" ਹਾਲਾਂਕਿ, ਭਾਰਤ ਸਰਕਾਰ ਪਹਿਲਾਂ ਹੀ ਟਰੰਪ ਦੇ ਅਜਿਹੇ ਦਾਅਵਿਆਂ ਨੂੰ ਕਈ ਵਾਰ ਖਾਰਜ ਕਰ ਚੁੱਕੀ ਹੈ।
Get all latest content delivered to your email a few times a month.
