ਵਿਸ਼ਵ ਜੰਗ ਦੇ ਮੁਹਾਨੇ 'ਤੇ ਮੱਧ ਪੂਰਬ: ਈਰਾਨ ਵੱਲੋਂ ਕਤਰ ਦੇ ਗੈਸ ਪਲਾਂਟ 'ਤੇ ਵੱਡਾ ਹਮਲਾ, ਭਾਰਤ ਸਣੇ ਦੁਨੀਆ ਭਰ 'ਚ ਗੈਸ ਸੰਕਟ ਦਾ ਡਰ

ਈਰਾਨ ਅਤੇ ਅਮਰੀਕਾ-ਇਜ਼ਰਾਈਲ ਗੱਠਜੋੜ ਵਿਚਾਲੇ ਚੱਲ ਰਹੀ ਜੰਗ ਹੁਣ ਇੱਕ ਬੇਹੱਦ ਖ਼ਤਰਨਾਕ ਮੋੜ 'ਤੇ ਪਹੁੰਚ ਗਈ ਹੈ। ਈਰਾਨ ਨੇ ਦੁਨੀਆ ਦੇ ਸਭ ਤੋਂ ਵੱਡੇ ਗੈਸ ਉਤਪਾਦਕ ਕੇਂਦਰਾਂ ਵਿੱਚੋਂ ਇੱਕ, ਕਤਰ ਦੇ ਰਾਸ ਲਾਫਾਨ (Ras Laffan) 'ਤੇ ਮਿਜ਼ਾਈਲਾਂ ਨਾਲ ਭਾਰੀ ਹਮਲਾ ਕਰਕੇ ਪੂਰੀ ਦੁਨੀਆ ਦੇ ਊਰਜਾ ਬਾਜ਼ਾਰ ਵਿੱਚ ਹੜਕੰਪ ਮਚਾ ਦਿੱਤਾ ਹੈ। ਇਸ ਹਮਲੇ ਤੋਂ ਬਾਅਦ ਕਤਰ ਤੋਂ ਹੋਣ ਵਾਲੀ ਗੈਸ ਸਪਲਾਈ ਪ੍ਰਭਾਵਿਤ ਹੋ ਗਈ ਹੈ, ਜਿਸ ਕਾਰਨ ਭਾਰਤ ਵਰਗੇ ਦੇਸ਼ਾਂ ਵਿੱਚ ਰਸੋਈ ਗੈਸ (LPG) ਅਤੇ ਕੁਦਰਤੀ ਗੈਸ ਦੀ ਭਾਰੀ ਕਿੱਲਤ ਹੋਣ ਦਾ ਖ਼ਦਸ਼ਾ ਪੈਦਾ ਹੋ ਗਿਆ ਹੈ।

ਇਜ਼ਰਾਈਲੀ ਹਮਲੇ ਦਾ ਬਦਲਾ ਹੈ ਇਹ ਕਾਰਵਾਈ?

ਮਾਹਿਰਾਂ ਅਨੁਸਾਰ, ਇਹ ਹਮਲਾ ਈਰਾਨ ਦੇ ਆਪਣੇ 'ਪਾਰਸ ਗੈਸ ਫੀਲਡ' 'ਤੇ ਹੋਏ ਇਜ਼ਰਾਈਲੀ ਹਮਲੇ ਦਾ ਸਿੱਧਾ ਜਵਾਬ ਹੈ। ਜ਼ਿਕਰਯੋਗ ਹੈ ਕਿ ਕੁਝ ਸਮਾਂ ਪਹਿਲਾਂ ਈਰਾਨ ਨੇ ਸਾਊਦੀ ਅਰਬ, ਯੂ.ਏ.ਈ. ਅਤੇ ਕਤਰ ਨੂੰ ਖੁੱਲ੍ਹੀ ਚੇਤਾਵਨੀ ਦਿੱਤੀ ਸੀ ਕਿ ਜੇਕਰ ਉਨ੍ਹਾਂ ਦੀ ਧਰਤੀ ਦੀ ਵਰਤੋਂ ਈਰਾਨ ਖ਼ਿਲਾਫ਼ ਹੋਈ, ਤਾਂ ਉਨ੍ਹਾਂ ਦੇ ਤੇਲ ਅਤੇ ਗੈਸ ਭੰਡਾਰਾਂ ਨੂੰ ਨਿਸ਼ਾਨਾ ਬਣਾਇਆ ਜਾਵੇਗਾ।

ਰਾਸ ਲਾਫਾਨ 'ਚ ਭਾਰੀ ਨੁਕਸਾਨ, ਪਰ ਜਾਨੀ ਬਚਾਅ ਕਤਰ ਐਨਰਜੀ ਨੇ ਪੁਸ਼ਟੀ ਕੀਤੀ ਹੈ ਕਿ ਈਰਾਨੀ ਮਿਜ਼ਾਈਲਾਂ ਕਾਰਨ ਇੰਡਸਟਰੀਅਲ ਸਿਟੀ ਦੇ ਕਈ ਹਿੱਸਿਆਂ ਵਿੱਚ ਭਿਆਨਕ ਅੱਗ ਲੱਗ ਗਈ ਅਤੇ ਢਾਂਚੇ ਨੂੰ ਕਾਫ਼ੀ ਨੁਕਸਾਨ ਪਹੁੰਚਿਆ ਹੈ। ਹਾਲਾਂਕਿ, ਕਤਰ ਦੇ ਰੱਖਿਆ ਸਿਸਟਮ ਨੇ ਕਈ ਮਿਜ਼ਾਈਲਾਂ ਨੂੰ ਹਵਾ ਵਿੱਚ ਹੀ ਨਸ਼ਟ ਕਰ ਦਿੱਤਾ, ਜਿਸ ਕਾਰਨ ਇੱਕ ਵੱਡਾ ਧਮਾਕਾ ਹੋਣੋਂ ਟਲ ਗਿਆ। ਰਾਹਤ ਦੀ ਗੱਲ ਇਹ ਰਹੀ ਕਿ ਇਸ ਹਮਲੇ ਵਿੱਚ ਕਿਸੇ ਕਰਮਚਾਰੀ ਦੀ ਜਾਨ ਨਹੀਂ ਗਈ ਅਤੇ ਸਿਵਲ ਡਿਫੈਂਸ ਦੀਆਂ ਟੀਮਾਂ ਨੇ ਅੱਗ 'ਤੇ ਕਾਬੂ ਪਾ ਲਿਆ ਹੈ।

ਕਤਰ ਦੀ ਸਖ਼ਤ ਚੇਤਾਵਨੀ:

'ਪ੍ਰਭੂਸੱਤਾ 'ਤੇ ਹਮਲਾ' ਕਤਰ ਦੇ ਵਿਦੇਸ਼ ਮੰਤਰਾਲੇ ਨੇ ਇਸ ਘਟਨਾ ਦੀ ਕਰੜੀ ਨਿੰਦਾ ਕਰਦਿਆਂ ਇਸ ਨੂੰ ਦੇਸ਼ ਦੀ ਸੁਰੱਖਿਆ ਨਾਲ ਖਿਲਵਾੜ ਦੱਸਿਆ ਹੈ। ਮੰਤਰਾਲੇ ਨੇ ਕਿਹਾ:

"ਕਤਰ ਨੇ ਹਮੇਸ਼ਾ ਖੇਤਰ ਵਿੱਚ ਸ਼ਾਂਤੀ ਦੀ ਵਕਾਲਤ ਕੀਤੀ ਹੈ, ਪਰ ਈਰਾਨ ਦੀ ਇਹ ਗੈਰ-ਜ਼ਿੰਮੇਵਾਰਾਨਾ ਹਰਕਤ ਪੂਰੇ ਮੱਧ ਪੂਰਬ ਨੂੰ ਅਜਿਹੀ ਅੱਗ ਵਿੱਚ ਝੋਕ ਰਹੀ ਹੈ, ਜਿਸ ਦਾ ਅਸਰ ਪੂਰੀ ਦੁਨੀਆ 'ਤੇ ਪਵੇਗਾ।"

ਭਾਰਤ 'ਤੇ ਕੀ ਹੋਵੇਗਾ ਅਸਰ?

ਕਤਰ ਭਾਰਤ ਨੂੰ ਐਲ.ਐਨ.ਜੀ. (LNG) ਸਪਲਾਈ ਕਰਨ ਵਾਲਾ ਸਭ ਤੋਂ ਵੱਡਾ ਦੇਸ਼ ਹੈ। ਜੇਕਰ ਰਾਸ ਲਾਫਾਨ ਤੋਂ ਸਪਲਾਈ ਲੰਬੇ ਸਮੇਂ ਲਈ ਰੁਕਦੀ ਹੈ, ਤਾਂ ਭਾਰਤ ਵਿੱਚ ਗੈਸ ਦੀਆਂ ਕੀਮਤਾਂ ਅਸਮਾਨੀ ਚੜ੍ਹ ਸਕਦੀਆਂ ਹਨ ਅਤੇ ਉਦਯੋਗਾਂ ਦੇ ਨਾਲ-ਨਾਲ ਆਮ ਲੋਕਾਂ ਦੀ ਰਸੋਈ ਦਾ ਬਜਟ ਵੀ ਵਿਗੜ ਸਕਦਾ ਹੈ।