ਪੰਜਾਬੀਆਂ ਦਾ ਮਾਣ: ਫਿਲੌਰ ਦੇ ਕੁਲਵਿੰਦਰ ਸਿੰਘ ਜੋਹਲ ਬਣੇ ਲੈਸਟਰ ਸਿਟੀ ਦੇ ਪਹਿਲੇ ਪੱਗੜੀਧਾਰੀ ਲਾਰਡ ਮੇਅਰ; ਟਾਊਨ ਹਾਲ 'ਚ ਚੁੱਕੀ ਸਹੁੰ

ਪੰਜਾਬ ਦੇ ਜ਼ਿਲ੍ਹਾ ਜਲੰਧਰ ਅਧੀਨ ਪੈਂਦੇ ਫਿਲੌਰ ਦੇ ਪਿੰਡ ਤੇਇੰਗ ਵਿੱਚ ਜਨਮੇ ਕੁਲਵਿੰਦਰ ਸਿੰਘ ਜੋਹਲ ਨੇ ਬਰਤਾਨੀਆ ਦੀ ਧਰਤੀ 'ਤੇ ਪੰਜਾਬ ਅਤੇ ਸਿੱਖ ਕੌਮ ਦਾ ਨਾਮ ਪੂਰੀ ਦੁਨੀਆ ਵਿੱਚ ਰੌਸ਼ਨ ਕੀਤਾ ਹੈ। ਕੌਂਸਲਰ ਕੁਲਵਿੰਦਰ ਸਿੰਘ ਜੋਹਲ ਇੰਗਲੈਂਡ ਦੇ ਇਤਿਹਾਸਕ ਸ਼ਹਿਰ ਲੈਸਟਰ ਦੇ ਪਹਿਲੇ ਗੁਰਸਿੱਖ (ਪੱਗੜੀਧਾਰੀ) ਲਾਰਡ ਮੇਅਰ ਬਣ ਗਏ ਹਨ। ਲੈਸਟਰ ਦੇ ਟਾਊਨ ਹਾਲ ਵਿਖੇ ਆਯੋਜਿਤ ਇੱਕ ਸ਼ਾਨਦਾਰ ਅਤੇ ਪ੍ਰਭਾਵਸ਼ਾਲੀ ਸਮਾਰੋਹ ਦੌਰਾਨ ਉਨ੍ਹਾਂ ਨੂੰ ਅਧਿਕਾਰਿਕ ਤੌਰ 'ਤੇ 'ਚੇਨ ਆਫ਼ ਆਫਿਸ' ਸੌਂਪ ਕੇ ਸ਼ਹਿਰ ਦਾ ਨਵਾਂ ਲਾਰਡ ਮੇਅਰ ਥਾਪਿਆ ਗਿਆ।

ਲੇਬਰ ਪਾਰਟੀ ਨਾਲ ਸਬੰਧਤ ਕੁਲਵਿੰਦਰ ਸਿੰਘ ਜੋਹਲ ਸਾਲ 2015 ਤੋਂ ਬ੍ਰਾਊਨਸਟੋਨ ਪਾਰਕ ਅਤੇ ਰਾਉਲੀ ਫੀਲਡਜ਼ ਵਾਰਡ ਤੋਂ ਲਗਾਤਾਰ ਕੌਂਸਲਰ ਵਜੋਂ ਸੇਵਾਵਾਂ ਨਿਭਾਉਂਦੇ ਆ ਰਹੇ ਹਨ। ਕੌਂਸਲ ਦੀ ਵਿਸ਼ੇਸ਼ ਮੀਟਿੰਗ ਦੌਰਾਨ ਉਨ੍ਹਾਂ ਨੂੰ ਸਰਵਸੰਮਤੀ ਨਾਲ ਸ਼ਹਿਰ ਦਾ ਪਹਿਲਾ ਨਾਗਰਿਕ (ਲਾਰਡ ਮੇਅਰ) ਚੁਣਿਆ ਗਿਆ। ਸਹੁੰ ਚੁੱਕਣ ਮਗਰੋਂ ਜੋਹਲ ਨੇ ਭਾਵੁਕ ਹੁੰਦਿਆਂ ਕਿਹਾ, "ਜਿਸ ਸ਼ਹਿਰ ਨੇ ਮੈਨੂੰ ਪਛਾਣ ਦਿੱਤੀ, ਅੱਜ ਉਸੇ ਸ਼ਹਿਰ ਦੀ ਅਗਵਾਈ ਕਰਨ ਦਾ ਮੌਕਾ ਮਿਲਣਾ ਮੇਰੇ ਲਈ ਸੱਚਾ ਸਨਮਾਨ ਹੈ। ਮੈਂ ਬਿਨਾਂ ਕਿਸੇ ਭੇਦਭਾਵ ਦੇ ਹਰ ਨਿਵਾਸੀ ਦੀ ਨਿਮਰਤਾ ਨਾਲ ਸੇਵਾ ਕਰਾਂਗਾ।"

ਆਪਣੇ ਕਾਰਜਕਾਲ ਦੇ ਏਜੰਡੇ ਦਾ ਐਲਾਨ ਕਰਦਿਆਂ ਨਵੇਂ ਲਾਰਡ ਮੇਅਰ ਨੇ ਦੱਸਿਆ ਕਿ ਉਹ ਮੁੱਖ ਤੌਰ 'ਤੇ ਦੋ ਸਮਾਜ ਸੇਵੀ ਸੰਸਥਾਵਾਂ ਦਾ ਸਮਰਥਨ ਕਰਨਗੇ। ਇਨ੍ਹਾਂ ਵਿੱਚ ਪਹਿਲੀ 'ਮਿਡਲੈਂਡ ਲੰਗਰ ਸੇਵਾ ਸੋਸਾਇਟੀ' ਹੈ, ਜੋ ਬੇਘਰਿਆਂ ਅਤੇ ਲੋੜਵੰਦਾਂ ਨੂੰ ਮੁਫ਼ਤ ਭੋਜਨ ਛਕਾਉਂਦੀ ਹੈ ਅਤੇ ਦੂਜੀ 'ਲੈਸਟਰ ਹਸਪਤਾਲਜ਼ ਚੈਰਿਟੀ' ਹੈ, ਜੋ ਸ਼ੂਗਰ ਅਤੇ ਗੁਰਦੇ ਦੀਆਂ ਬਿਮਾਰੀਆਂ ਦੀ ਜਲਦੀ ਪਛਾਣ ਤੇ ਇਲਾਜ ਲਈ ਕੰਮ ਕਰਦੀ ਹੈ।

ਇਸ ਵੱਕਾਰੀ ਅਹੁਦੇ ਦੀਆਂ ਜ਼ਿੰਮੇਵਾਰੀਆਂ ਨਿਭਾਉਣ ਵਿੱਚ ਉਨ੍ਹਾਂ ਦੀ ਪਤਨੀ ਮੰਜੀਤ ਕੌਰ ਜੋਹਲ 'ਲੇਡੀ ਮੇਅਰਸ' ਵਜੋਂ ਅਤੇ ਉਨ੍ਹਾਂ ਦੀ ਬੇਟੀ ਗੁਰਸਿਮਰਨ ਕੌਰ ਤੇ ਬੇਟਾ ਅਸ਼ਵੀਰ ਸਿੰਘ 'ਕਾਂਸੋਰਟ' ਵਜੋਂ ਉਨ੍ਹਾਂ ਦੇ ਨਾਲ ਰਹਿਣਗੇ। ਜ਼ਿਕਰਯੋਗ ਹੈ ਕਿ ਜੋਹਲ ਲੈਸਟਰ ਦੇ ਪ੍ਰਸਿੱਧ ਗੁਰੂ ਨਾਨਕ ਗੁਰਦੁਆਰਾ (GNG) ਦੇ ਜਨਰਲ ਸਕੱਤਰ ਵਜੋਂ ਵੀ ਲੰਬਾ ਸਮਾਂ ਸੇਵਾ ਨਿਭਾਅ ਚੁੱਕੇ ਹਨ।

ਕੁਲਵਿੰਦਰ ਸਿੰਘ ਜੋਹਲ ਦੀ ਇਹ ਸਫ਼ਲਤਾ ਬੇਹੱਦ ਪ੍ਰੇਰਨਾਦਾਇਕ ਹੈ। ਉਨ੍ਹਾਂ ਨੇ ਲੈਸਟਰ ਦੀ ਇੱਕ ਫਾਊਂਡਰੀ 'ਰਸਲ ਕਾਸਟਿੰਗਜ਼' ਵਿੱਚ 25 ਸਾਲਾਂ ਤੱਕ ਇੱਕ ਸਧਾਰਨ ਮਜ਼ਦੂਰ ਵਜੋਂ ਕੰਮ ਕੀਤਾ। ਇਸ ਦੌਰਾਨ ਉਹ ਇੱਕ ਸਰਗਰਮ ਟਰੇਡ ਯੂਨੀਅਨ ਆਗੂ ਵੀ ਰਹੇ ਅਤੇ ਮਜ਼ਦੂਰਾਂ ਦੇ ਹੱਕਾਂ ਲਈ ਲੜਦੇ ਰਹੇ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਨੌਜਵਾਨਾਂ ਨੂੰ ਨਸ਼ਿਆਂ ਅਤੇ ਬੁਰਾਈਆਂ ਤੋਂ ਦੂਰ ਰੱਖਣ ਲਈ 'GNG ਫੁੱਟਬਾਲ ਕਲੱਬ' ਦੀ ਸਥਾਪਨਾ ਕੀਤੀ, ਜੋ ਅੱਜ ਯੂਕੇ ਦੇ ਸਭ ਤੋਂ ਵੱਡੇ ਭਾਈਚਾਰਕ ਖੇਡ ਸੰਗਠਨਾਂ ਵਿੱਚੋਂ ਇੱਕ ਹੈ। ਉਨ੍ਹਾਂ ਦੀ ਇਸ ਇਤਿਹਾਸਕ ਪ੍ਰਾਪਤੀ 'ਤੇ ਪੰਜਾਬ ਵਿੱਚ ਰਹਿੰਦੇ ਉਨ੍ਹਾਂ ਦੇ ਰਿਸ਼ਤੇਦਾਰਾਂ ਅਤੇ ਪਿੰਡ ਵਾਸੀਆਂ ਵਿੱਚ ਖ਼ੁਸ਼ੀ ਦੀ ਲਹਿਰ ਹੈ।