FSSAI ਨੇ ਇਨ੍ਹਾਂ ਚੀਜ਼ਾਂ 'ਤੇ ਲਗਾਈ ਪਾਬੰਦੀ , ਹੁਣ ਫੂਡ ਪੈਕਿੰਗ ਦੇ ਨਿਯਮਾਂ ਦੀ ਉਲੰਘਣਾ ਕਰਨ 'ਤੇ ਲੱਗੇਗਾ ਭਾਰੀ ਜੁਰਮਾਨਾ

ਚੰਡੀਗੜ੍ਹ : ਚਾਹੇ ਉਹ ਮਠਿਆਈਆਂ ਦਾ ਡੱਬਾ ਹੋਵੇ, ਸਨੈਕਸ ਦਾ ਪੈਕੇਟ ਹੋਵੇ, ਬੇਕਰੀ ਦੀਆਂ ਚੀਜ਼ਾਂ ਹੋਣ ਜਾਂ ਔਨਲਾਈਨ ਭੋਜਨ, ਸਾਡੇ ਵਿੱਚੋਂ ਜ਼ਿਆਦਾਤਰ ਲੋਕ ਅੰਨ੍ਹੇਵਾਹ ਪੈਕੇਜ ਖੋਲ੍ਹਦੇ ਹਨ ਅਤੇ ਖਾ ਜਾਂਦੇ ਹਨ। ਪਰ ਕੀ ਤੁਸੀਂ ਕਦੇ ਖਾਣੇ ਦੇ ਪੈਕੇਜ ਨੂੰ ਖੋਲ੍ਹਦੇ ਸਮੇਂ ਉਸ ਨਾਲ ਜੁੜੇ ਸਟੈਪਲ ਪਿੰਨ, ਤਾਰਾਂ ਜਾਂ ਧਾਤ ਦੇ ਕਲਿੱਪਾਂ ਵੱਲ ਧਿਆਨ ਦਿੱਤਾ ਹੈ? ਜੇਕਰ ਅਜਿਹੀ ਤਿੱਖੀ ਧਾਤ ਗਲਤੀ ਨਾਲ ਭੋਜਨ ਵਿੱਚ ਆ ਜਾਂਦੀ ਹੈ ਅਤੇ ਸਾਡੇ ਪੇਟ ਤੱਕ ਪਹੁੰਚ ਜਾਂਦੀ ਹੈ, ਤਾਂ ਇਹ ਗੰਭੀਰ ਨੁਕਸਾਨ ਪਹੁੰਚਾ ਸਕਦੀ ਹੈ।

ਇਸ ਜੋਖਮ ਦੇ ਮੱਦੇਨਜ਼ਰ, ਫੂਡ ਸੇਫਟੀ ਐਂਡ ਸਟੈਂਡਰਡਜ਼ ਅਥਾਰਟੀ ਆਫ਼ ਇੰਡੀਆ (FSSAI) ਨੇ ਹਾਲ ਹੀ ਵਿੱਚ ਫੂਡ ਕਾਰੋਬਾਰਾਂ ਦੇ ਮਾਲਕਾਂ ਲਈ ਇੱਕ ਮਹੱਤਵਪੂਰਨ ਨਿਰਦੇਸ਼ ਜਾਰੀ ਕੀਤਾ ਹੈ। FSSAI ਨੇ ਫੂਡ ਪੈਕਿੰਗ ਵਿੱਚ ਸਟੈਪਲ ਪਿੰਨ, ਤਾਰਾਂ ਅਤੇ ਹੋਰ ਧਾਤ ਸਮੱਗਰੀ ਦੀ ਵਰਤੋਂ 'ਤੇ ਪਾਬੰਦੀ ਲਗਾ ਦਿੱਤੀ ਹੈ।

ਇਹ ਨਵੇਂ ਦਿਸ਼ਾ-ਨਿਰਦੇਸ਼ ਫੂਡ ਰੈਗੂਲੇਟਰ 'ਫੂਡ ਸੇਫਟੀ ਐਂਡ ਸਟੈਂਡਰਡਜ਼ ਅਥਾਰਟੀ ਆਫ ਇੰਡੀਆ' (FSSAI) ਵੱਲੋਂ ਸਾਰੇ ਫੂਡ ਬਿਜ਼ਨਸ ਆਪਰੇਟਰਾਂ (FBOs) ਲਈ ਜਾਰੀ ਕੀਤੇ ਹਨ। ਆਪਰੇਟਰਾਂ ਨੂੰ ਹਦਾਇਤ ਕੀਤੀ ਗਈ ਹੈ ਕਿ ਉਹ ਭੋਜਨ ਵਸਤੂਆਂ ਅਤੇ ਪਾਰਸਲਾਂ ਦੀ ਪੈਕਿੰਗ ਲਈ ਧਾਤ ਦੀਆਂ ਪਿੰਨਾਂ ਅਤੇ ਤਾਰਾਂ ਦੀ ਵਰਤੋਂ ਤੁਰੰਤ ਬੰਦ ਕਰਨ ਕਿਉਂਕਿ ਇਹ ਖਪਤਕਾਰਾਂ ਦੀ ਸਿਹਤ 'ਤੇ ਮਾੜਾ ਪ੍ਰਭਾਵ ਪਾਉਂਦੀਆਂ ਹਨ।