ਤਾਜਾ ਖਬਰਾਂ
ਉੱਤਰ ਪ੍ਰਦੇਸ਼ ਦੇ ਆਗਰਾ ਜ਼ਿਲ੍ਹੇ ਦੇ ਸਿਕੰਦਰਾ ਖੇਤਰ ਵਿੱਚ ਇੱਕ ਅਜਿਹਾ ਖ਼ੌਫ਼ਨਾਕ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਨੇ ਸਭ ਦੇ ਹੋਸ਼ ਉਡਾ ਦਿੱਤੇ ਹਨ। ਇੱਥੋਂ ਦੇ ਦਹਤੋਰਾ ਇਲਾਕੇ ਵਿੱਚ ਰਹਿਣ ਵਾਲੀ ਇੱਕ ਔਰਤ ਨੇ ਆਪਣੇ ਪਤੀ ਦੇ ਰੋਜ਼-ਰੋਜ਼ ਦੇ ਸ਼ਰਾਬੀ ਕਲੇਸ਼ ਤੋਂ ਤੰਗ ਆ ਕੇ ਉਸ ਦਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ। ਇੰਨਾ ਹੀ ਨਹੀਂ, ਵਾਰਦਾਤ ਨੂੰ ਛੁਪਾਉਣ ਲਈ ਉਸ ਨੇ ਪਤੀ ਦੀ ਲਾਸ਼ ਨੂੰ ਬਾਥਰੂਮ ਦੇ ਫਰਸ਼ ਹੇਠਾਂ ਦਫ਼ਨਾ ਦਿੱਤਾ ਅਤੇ ਉੱਪਰੋਂ ਮਿਸਤਰੀ ਬੁਲਾ ਕੇ ਟਾਈਲਾਂ ਲਗਵਾ ਦਿੱਤੀਆਂ। ਕਤਲ ਦੇ 45 ਦਿਨਾਂ ਬਾਅਦ, ਪੁਲਿਸ ਦੀ ਅਚਾਨਕ ਆਮਦ ਤੋਂ ਘਬਰਾਈ ਮੁਲਜ਼ਮ ਪਤਨੀ ਨੇ ਖ਼ੁਦ ਹੀ ਆਪਣੇ ਜੇਠ ਕੋਲ ਗੁਨਾਹ ਕਬੂਲ ਕਰ ਲਿਆ, ਜਿਸ ਤੋਂ ਬਾਅਦ ਪੁਲਿਸ ਨੇ ਫਰਸ਼ ਪੁੱਟ ਕੇ ਮ੍ਰਿਤਕ ਦਾ ਪਿੰਜਰ ਬਰਾਮਦ ਕੀਤਾ ਹੈ।
ਪੁਲਿਸ ਮੁਤਾਬਕ ਮ੍ਰਿਤਕ ਸੁਰੇਂਦਰ (44) ਕੋਈ ਕੰਮ ਨਹੀਂ ਕਰਦਾ ਸੀ ਅਤੇ ਸ਼ਰਾਬ ਪੀ ਕੇ ਆਪਣੀ ਪਤਨੀ ਰੂਬੀ ਨਾਲ ਲਗਾਤਾਰ ਕੁੱਟਮਾਰ ਕਰਦਾ ਸੀ। ਇਸ ਤੋਂ ਪਰੇਸ਼ਾਨ ਹੋ ਕੇ ਰੂਬੀ ਨੇ ਖ਼ੌਫ਼ਨਾਕ ਸਾਜ਼ਿਸ਼ ਰਚੀ ਅਤੇ ਖੀਰ ਵਿੱਚ 20 ਤੋਂ ਵੱਧ ਨੀਂਦ ਦੀਆਂ ਗੋਲੀਆਂ ਮਿਲਾ ਕੇ ਸੁਰੇਂਦਰ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ। ਵਾਰਦਾਤ ਵਾਲੇ ਦਿਨ 18 ਮਈ ਨੂੰ ਉਸ ਨੇ ਆਪਣੇ ਜੇਠ ਅਨਿਲ ਨੂੰ ਫ਼ੋਨ ਕਰਕੇ ਬੱਚਿਆਂ ਅਤੇ ਸੱਸ ਨੂੰ ਆਪਣੇ ਨਾਲ ਲੈ ਜਾਣ ਲਈ ਕਿਹਾ। ਅਗਲੇ ਦਿਨ ਰੂਬੀ ਨੇ ਜੇਠ ਨੂੰ ਝੂਠੀ ਕਹਾਣੀ ਸੁਣਾਈ ਕਿ ਸੁਰੇਂਦਰ ਘਰੋਂ 3 ਹਜ਼ਾਰ ਰੁਪਏ ਲੈ ਕੇ ਕਿਧਰੇ ਚਲਾ ਗਿਆ ਹੈ। ਸ਼ੱਕ ਨੂੰ ਦੂਰ ਕਰਨ ਲਈ ਰੂਬੀ ਨੇ 26 ਮਈ ਨੂੰ ਖ਼ੁਦ ਜੇਠ ਨਾਲ ਜਾ ਕੇ ਥਾਣੇ ਵਿੱਚ ਪਤੀ ਦੀ ਗੁੰਮਸ਼ੁਦਗੀ ਦੀ ਰਿਪੋਰਟ ਵੀ ਦਰਜ ਕਰਵਾਈ।
ਕਤਲ ਦਾ ਇਹ ਭੇਤ ਉਦੋਂ ਤੱਕ ਦੱਬਿਆ ਰਿਹਾ ਜਦੋਂ ਤੱਕ ਬੁੱਧਵਾਰ ਨੂੰ ਪੁਲਿਸ ਸੁਰੇਂਦਰ ਵਿਰੁੱਧ ਸਾਲ 2017 ਦੇ ਇੱਕ ਪੁਰਾਣੇ ਟਰੱਕ ਚੋਰੀ ਦੇ ਮਾਮਲੇ ਦੀ ਪੁਸ਼ਟੀ ਕਰਨ ਲਈ ਅਚਾਨਕ ਉਸ ਦੇ ਘਰ ਨਹੀਂ ਪਹੁੰਚੀ। ਪੁਲਿਸ ਨੂੰ ਘਰ ਆਇਆ ਦੇਖ ਅਤੇ ਅਧਿਕਾਰੀਆਂ ਵੱਲੋਂ ਉਸ ਦੀਆਂ ਫੋਟੋਆਂ ਖਿੱਚੇ ਜਾਣ ਕਾਰਨ ਰੂਬੀ ਬੁਰੀ ਤਰ੍ਹਾਂ ਡਰ ਗਈ। ਉਸ ਨੂੰ ਲੱਗਿਆ ਕਿ ਸ਼ਾਇਦ ਪੁਲਿਸ ਨੂੰ ਕਤਲ ਦੀ ਭਣਕ ਲੱਗ ਚੁੱਕੀ ਹੈ। ਇਸੇ ਘਬਰਾਹਟ ਵਿੱਚ ਸ਼ੁੱਕਰਵਾਰ ਨੂੰ ਉਸ ਨੇ ਆਪਣੇ ਜੇਠ ਅਨਿਲ ਨੂੰ ਫ਼ੋਨ ਕਰਕੇ ਸਾਰੀ ਹਕੀਕਤ ਉਗਲ ਦਿੱਤੀ। ਜੇਠ ਨੇ ਬਿਨਾਂ ਦੇਰੀ ਕੀਤੇ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ।
ਜਦੋਂ ਪੁਲਿਸ ਨੇ ਰੂਬੀ ਨੂੰ ਹਿਰਾਸਤ ਵਿੱਚ ਲਿਆ ਤਾਂ ਉਹ ਵਾਰ-ਵਾਰ ਆਪਣੇ ਬਿਆਨ ਬਦਲਦੀ ਰਹੀ। ਪਹਿਲਾਂ ਉਸ ਨੇ ਨੀਂਦ ਦੀਆਂ ਗੋਲੀਆਂ ਦੀ ਗੱਲ ਕਹੀ ਅਤੇ ਫਿਰ ਕਹਿਣ ਲੱਗੀ ਕਿ ਪਤੀ ਨੇ ਖੁਦਕੁਸ਼ੀ ਕੀਤੀ ਸੀ। ਰੂਬੀ ਨੇ ਦੱਸਿਆ ਕਿ ਬਾਥਰੂਮ ਦਾ ਫਰਸ਼ ਕਮਰੇ ਨਾਲੋਂ 2-3 ਫੁੱਟ ਨੀਵਾਂ ਸੀ, ਇਸ ਲਈ ਲਾਸ਼ ਉੱਥੇ ਰੱਖ ਕੇ ਉੱਪਰ ਮਿੱਟੀ ਪਾ ਦਿੱਤੀ ਅਤੇ ਮਿਸਤਰੀ ਕੋਲੋਂ ਪੱਕਾ ਫਰਸ਼ ਬਣਵਾ ਲਿਆ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਉਹ ਪਿਛਲੇ ਡੇਢ ਮਹੀਨੇ ਤੋਂ ਉਸੇ ਬਾਥਰੂਮ ਵਿੱਚ ਨਹਾਉਂਦੀ ਰਹੀ ਅਤੇ ਬੇਖ਼ੌਫ਼ ਹੋ ਕੇ ਘਰ ਵਿੱਚ ਰਹਿ ਰਹੀ ਸੀ। ਹਾਲਾਂਕਿ ਪੁਲਿਸ ਦਾ ਮੰਨਣਾ ਹੈ ਕਿ ਲਾਸ਼ ਨੂੰ ਇਕੱਲੇ ਦਫ਼ਨਾਉਣਾ ਕਿਸੇ ਇੱਕ ਜਣੇ ਦੇ ਵੱਸ ਦਾ ਕੰਮ ਨਹੀਂ ਹੈ, ਇਸ ਲਈ ਇਸ ਕਾਂਡ ਵਿੱਚ ਕਿਸੇ ਹੋਰ ਦੇ ਸ਼ਾਮਲ ਹੋਣ ਦਾ ਵੀ ਸ਼ੱਕ ਹੈ। ਪੁਲਿਸ ਨੇ ਕਤਲ ਦੀ ਐਫ.ਆਈ.ਆਰ. ਦਰਜ ਕਰਕੇ ਪਿੰਜਰ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਹੈ ਅਤੇ ਮਾਮਲੇ ਦੀ ਡੂੰਘਾਈ ਨਾਲ ਪੁੱਛਗਿੱਛ ਜਾਰੀ ਹੈ।
Get all latest content delivered to your email a few times a month.
