ਗਵਾਲੀਅਰ 'ਚ ਆਡੀਓ ਰਿਕਾਰਡਿੰਗ ਵਾਇਰਲ ਹੋਣ ਤੋਂ ਦੁਖੀ ਸ਼ਾਦੀਸ਼ੁਦਾ ਔਰਤ ਨੇ ਜ਼ਹਿਰ ਖਾ ਕੇ ਕੀਤੀ ਆਤਮਹੱਤਿਆ, ਪਰਿਵਾਰ ਦਾ ਹੰਗਾਮਾ

ਮੱਧ ਪ੍ਰਦੇਸ਼ ਦੇ ਗਵਾਲੀਅਰ ਸਥਿਤ ਪੁਰਾਨੀ ਛਾਵਨੀ ਥਾਣਾ ਖੇਤਰ ਵਿੱਚ ਪ੍ਰੇਮ ਪ੍ਰਸੰਗ ਅਤੇ ਬਦਨਾਮੀ ਤੋਂ ਦੁਖੀ ਹੋ ਕੇ ਇੱਕ ਵਿਆਹੁਤਾ ਔਰਤ ਵੱਲੋਂ ਜ਼ਹਿਰੀਲੀ ਚੀਜ਼ ਨਿਗਲ ਕੇ ਜੀਵਨ ਲੀਲਾ ਸਮਾਪਤ ਕਰਨ ਦਾ ਦਰਦਨਾਕ ਮਾਮਲਾ ਸਾਹਮਣੇ ਆਇਆ ਹੈ। ਮ੍ਰਿਤਕਾ ਦਾ ਗੁਆਂਢ ਵਿੱਚ ਰਹਿੰਦੇ ਇੱਕ ਵਿਅਕਤੀ ਨਾਲ ਕਥਿਤ ਪ੍ਰੇਮ ਸਬੰਧ ਸੀ। ਦੋਸ਼ ਹੈ ਕਿ ਉਕਤ ਵਿਅਕਤੀ ਨੇ ਔਰਤ ਨਾਲ ਕੀਤੀ ਗੱਲਬਾਤ ਦੀ ਕਾਲ ਰਿਕਾਰਡਿੰਗ ਕਰ ਲਈ ਸੀ, ਜਿਸ ਨੂੰ ਬਾਅਦ ਵਿੱਚ ਪ੍ਰੇਮੀ ਦੀ ਪਤਨੀ ਨੇ ਮਿਊਜ਼ਿਕ ਸਿਸਟਮ (ਲਾਊਡ ਸਪੀਕਰ) 'ਤੇ ਚਲਾ ਕੇ ਪੂਰੇ ਮੁੱਹਲੇ ਨੂੰ ਸੁਣਾ ਦਿੱਤਾ। ਇਸ ਬਦਨਾਮੀ ਤੋਂ ਦੁਖੀ ਹੋ ਕੇ ਔਰਤ ਨੇ ਇਹ ਖ਼ੌਫ਼ਨਾਕ ਕਦਮ ਚੁੱਕਿਆ।

ਔਰਤ ਦੀ ਮੌਤ ਤੋਂ ਬਾਅਦ ਗੁੱਸੇ ਵਿੱਚ ਆਏ ਪਰਿਵਾਰਕ ਮੈਂਬਰਾਂ ਨੇ ਸੜਕ 'ਤੇ ਲਾਸ਼ ਰੱਖ ਕੇ ਭਾਰੀ ਹੰਗਾਮਾ ਕੀਤਾ, ਜਿਸ ਤੋਂ ਬਾਅਦ ਮੌਕੇ 'ਤੇ ਪਹੁੰਚੇ ਪੁਲਿਸ ਅਧਿਕਾਰੀਆਂ ਨੇ ਉਨ੍ਹਾਂ ਨੂੰ ਸ਼ਾਂਤ ਕਰਵਾਇਆ। ਇਲਾਜ ਦੌਰਾਨ ਹਸਪਤਾਲ 'ਚ ਦਮ ਤੋੜਨ ਵਾਲੀ ਔਰਤ ਦੀ ਲਾਸ਼ ਦਾ ਪੋਸਟਮਾਰਟਮ ਕਰਵਾ ਕੇ ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਇਹ ਵਾਰਦਾਤ ਪੁਰਾਨੀ ਛਾਵਨੀ ਦੇ ਕ੍ਰਿਸ਼ਨਾ ਨਗਰ ਪਹਾੜੀ, ਮੋਤੀ ਝੀਲ ਦੀ ਹੈ। ਇੱਥੇ ਰਹਿਣ ਵਾਲੀ 32 ਸਾਲਾ ਮਮਤਾ ਯਾਦਵ ਦਾ ਵਿਆਹ 15 ਸਾਲ ਪਹਿਲਾਂ ਰਾਮਹੇਤ ਯਾਦਵ ਨਾਲ ਹੋਇਆ ਸੀ, ਜੋ ਕਿ ਫਲ ਮੰਡੀ ਵਿੱਚ ਮਜ਼ਦੂਰੀ ਕਰਦਾ ਹੈ। ਰਾਮਹੇਤ ਅਨੁਸਾਰ 17 ਅਗਸਤ ਨੂੰ ਜਦੋਂ ਉਹ ਕੰਮ ਤੋਂ ਘਰ ਲੌਟਿਆ ਤਾਂ ਉਸ ਨੇ ਪਤਨੀ ਨੂੰ ਬੇਹੋਸ਼ੀ ਦੀ ਹਾਲਤ 'ਚ ਦੇਖਿਆ ਅਤੇ ਕੋਲ ਹੀ ਜ਼ਹਿਰ ਦੀ ਸ਼ੀਸ਼ੀ ਪਈ ਸੀ। ਉਸ ਨੂੰ ਤੁਰੰਤ ਜਯਾਰੋਗਿਆ ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ, ਜਿੱਥੇ ਬੁੱਧਵਾਰ ਸਵੇਰੇ ਉਸ ਦੀ ਮੌਤ ਹੋ ਗਈ।

ਮ੍ਰਿਤਕਾ ਦੇ ਪਤੀ ਨੇ ਦੋਸ਼ ਲਾਇਆ ਕਿ ਮਮਤਾ ਨੇ ਦਮ ਤੋੜਨ ਤੋਂ ਪਹਿਲਾਂ ਦੱਸਿਆ ਸੀ ਕਿ ਉਸ ਦੀ ਗੁਆਂਢੀ ਸੁਰੇਂਦਰ ਯਾਦਵ ਨਾਲ ਗੱਲਬਾਤ ਹੁੰਦੀ ਸੀ। ਸੁਰੇਂਦਰ ਨੇ ਇਹ ਰਿਕਾਰਡਿੰਗ ਆਪਣੇ ਫੋਨ 'ਚ ਰੱਖੀ ਹੋਈ ਸੀ, ਜੋ ਉਸ ਦੀ ਪਤਨੀ ਰੇਖਾ ਦੇ ਹੱਥ ਲੱਗ ਗਈ। ਰੇਖਾ ਨੇ ਘਰ ਦੇ ਬਾਹਰ ਲਾਊਡ ਸਪੀਕਰ ਲਗਾ ਕੇ ਇਹ ਆਡੀਓ ਪੂਰੇ ਮੁੱਹਲੇ ਵਿੱਚ ਚਲਾ ਦਿੱਤੀ, ਜਿਸ ਨਾਲ ਮਮਤਾ ਡਿਪ੍ਰੈਸ਼ਨ 'ਚ ਆ ਗਈ।

ਪਤੀ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ 'ਚ ਪ੍ਰੇਮੀ ਸੁਰੇਂਦਰ, ਉਸ ਦੀ ਪਤਨੀ ਰੇਖਾ, ਭਰਾ ਰਾਜਪਾਲ ਅਤੇ ਮਮਤਾ ਦੇ ਦਿਓਰ ਵਿਨੋਦ ਤੇ ਉਸ ਦੀ ਪਤਨੀ ਜੂਲੀ 'ਤੇ ਪਿਛਲੇ ਡੇਢ ਸਾਲ ਤੋਂ ਮਮਤਾ ਨੂੰ ਪ੍ਰੇਸ਼ਾਨ ਕਰਨ ਅਤੇ ਬਲੈਕਮੇਲ ਕਰਨ ਦੇ ਦੋਸ਼ ਲਗਾਏ ਹਨ। ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਮੋਬਾਈਲ ਅਤੇ ਰਿਕਾਰਡਿੰਗ ਜ਼ਬਤ ਕਰ ਲਈ ਹੈ ਅਤੇ ਕਾਨੂੰਨੀ ਕਾਰਵਾਈ ਕੀਤੀ ਜਾ ਰਹੀ ਹੈ।