ਦਿੱਲੀ 'ਚ ਦਿਲਜੀਤ ਦੋਸਾਂਝ ਦਾ ਮਹਾ-ਸ਼ੋਅ ਅੱਜ: ਕੰਸਰਟ 'ਚ ਜਾਣ ਤੋਂ ਪਹਿਲਾਂ ਜਾਣੋ ਇਹ ਜ਼ਰੂਰੀ ਨਿਯਮ

ਮਸ਼ਹੂਰ ਪੰਜਾਬੀ ਗਾਇਕ ਤੇ ਅਦਾਕਾਰ ਦਿਲਜੀਤ ਦੋਸਾਂਝ ਦੇ ਪ੍ਰਸ਼ੰਸਕਾਂ ਦਾ ਇੰਤਜ਼ਾਰ ਅੱਜ ਖ਼ਤਮ ਹੋਣ ਜਾ ਰਿਹਾ ਹੈ। ਦਿਲਜੀਤ ਦੇ ਚਰਚਿਤ 'ਔਰਾ ਇੰਡੀਆ ਟੂਰ 2026' ਦਾ ਪਹਿਲਾ ਧਮਾਕੇਦਾਰ ਸ਼ੋਅ ਅੱਜ, 30 ਅਕਤੂਬਰ ਨੂੰ ਰਾਜਧਾਨੀ ਦੇ ਜਵਾਹਰ ਲਾਲ ਨਹਿਰੂ (JLN) ਸਟੇਡੀਅਮ ਵਿਖੇ ਆਯੋਜਿਤ ਕੀਤਾ ਜਾ ਰਹਾ ਹੈ। ਜ਼ਿਕਰਯੋਗ ਹੈ ਕਿ ਇਹ ਸ਼ੋਅ ਪਹਿਲਾਂ 1 ਨਵੰਬਰ ਲਈ ਤੈਅ ਕੀਤਾ ਗਿਆ ਸੀ, ਪਰ ਬਾਅਦ ਵਿੱਚ ਤਾਰੀਖ਼ ਵਿੱਚ ਬਦਲਾਅ ਕਰਕੇ ਇਸ ਨੂੰ 30 ਅਕਤੂਬਰ ਕਰ ਦਿੱਤਾ ਗਿਆ।

ਸ਼ੋਅ ਵਿੱਚ ਹਜ਼ਾਰਾਂ ਦੀ ਗਿਣਤੀ ਵਿੱਚ ਪ੍ਰਸ਼ੰਸਕਾਂ ਦੇ ਪਹੁੰਚਣ ਦੀ ਸੰਭਾਵਨਾ ਨੂੰ ਦੇਖਦਿਆਂ ਪ੍ਰਬੰਧਕਾਂ ਅਤੇ ਦਿੱਲੀ ਪ੍ਰਸ਼ਾਸਨ ਵਲੋਂ ਪੁਖ਼ਤਾ ਇੰਤਜ਼ਾਮ ਕੀਤੇ ਗਏ ਹਨ।

ਦਰਸ਼ਕਾਂ ਲਈ ਜ਼ਰੂਰੀ ਦਿਸ਼ਾ-ਨਿਰਦੇਸ਼

ਸਮੇਂ ਤੋਂ ਪਹਿਲਾਂ ਪਹੁੰਚੋ: ਸਟੇਡੀਅਮ 'ਚ ਦਾਖਲੇ ਅਤੇ ਸਖ਼ਤ ਸੁਰੱਖਿਆ ਜਾਂਚ (Security Check) ਦੌਰਾਨ ਲੰਮਾ ਸਮਾਂ ਲੱਗ ਸਕਦਾ ਹੈ। ਇਸ ਲਈ ਆਖਰੀ ਪਲ 'ਚ ਪਹੁੰਚਣ ਦੀ ਬਜਾਏ ਟਿਕਟ 'ਤੇ ਦਿੱਤੇ ਗਏ ਸਮੇਂ ਅਨੁਸਾਰ ਜਲਦੀ ਪਹੁੰਚਣ ਦੀ ਸਲਾਹ ਦਿੱਤੀ ਗਈ ਹੈ।

ਦੁਬਾਰਾ ਦਾਖਲਾ ਨਹੀਂ ਮਿਲੇਗਾ (No Re-entry): ਇੱਕ ਵਾਰ ਸਟੇਡੀਅਮ ਦੇ ਅੰਦਰ ਚਲੇ ਜਾਣ ਤੋਂ ਬਾਅਦ ਬਾਹਰ ਆ ਕੇ ਦੁਬਾਰਾ ਦਾਖਲ ਹੋਣ ਦੀ ਇਜਾਜ਼ਤ ਨਹੀਂ ਹੋਵੇਗੀ।

ਸਮਾਨ ਤੇ ਨਿਯਮ: ਅੰਦਰ ਜਾਣ ਤੋਂ ਪਹਿਲਾਂ ਆਪਣੀਆਂ ਟਿਕਟਾਂ 'ਤੇ ਲਿਖੀਆਂ ਹਦਾਇਤਾਂ ਅਤੇ ਪ੍ਰਬੰਧਕਾਂ ਦੀ ਅਧਿਕਾਰਤ ਗਾਈਡਲਾਈਨਜ਼ ਅਨੁਸਾਰ ਪ੍ਰੋਫਿਟਡ (ਮਨਾਹੀ ਵਾਲੀਆਂ) ਵਸਤੂਆਂ ਦੀ ਜਾਂਚ ਜ਼ਰੂਰ ਕਰ ਲਵੋ।

ਮੈਟਰੋ ਸੇਵਾਵਾਂ ਅੱਧੀ ਰਾਤ ਤੱਕ; ਵਾਧੂ ਟ੍ਰੇਨਾਂ ਦਾ ਪ੍ਰਬੰਧ

ਕੰਸਰਟ ਕਾਰਨ ਹੋਣ ਵਾਲੇ ਜਾਮ ਤੋਂ ਬਚਣ ਲਈ ਦਿੱਲੀ ਮੈਟਰੋ ਰੇਲ ਕਾਰਪੋਰੇਸ਼ਨ (DMRC) ਨੇ ਵੱਡਾ ਫੈਸਲਾ ਲਿਆ ਹੈ:

ਅੱਧੀ ਰਾਤ ਤੱਕ ਟ੍ਰੇਨਾਂ: ਦਰਸ਼ਕਾਂ ਦੀ ਸਹੂਲਤ ਲਈ 30 ਅਕਤੂਬਰ ਦੀ ਰਾਤ ਨੂੰ ਮੈਟਰੋ ਸੇਵਾਵਾਂ ਅੱਧੀ ਰਾਤ (Midnight) ਤੱਕ ਚਲਾਈਆਂ ਜਾਣਗੀਆਂ ਅਤੇ ਵਾਧੂ ਟ੍ਰੇਨਾਂ ਵੀ ਫੇਰੇ ਲਗਾਉਣਗੀਆਂ। (ਨੋਟ: ਇਹ ਵਾਧੂ ਸਹੂਲਤ ਏਅਰਪੋਰਟ ਐਕਸਪ੍ਰੈਸ ਲਾਈਨ ਅਤੇ ਰੈਪਿਡ ਮੈਟਰੋ 'ਤੇ ਲਾਗੂ ਨਹੀਂ ਹੋਵੇਗੀ।)

ਨੇੜਲੇ ਮੈਟਰੋ ਸਟੇਸ਼ਨ: ਦਰਸ਼ਕ ਵਾਇਲੇਟ ਲਾਈਨ (Violet Line) 'ਤੇ ਸਥਿਤ ਜਵਾਹਰ ਲਾਲ ਨਹਿਰੂ ਸਟੇਡੀਅਮ ਮੈਟਰੋ ਸਟੇਸ਼ਨ ਜਾਂ ਜੰਗਪੁਰਾ ਮੈਟਰੋ ਸਟੇਸ਼ਨ ਦੀ ਵਰਤੋਂ ਕਰ ਸਕਦੇ ਹਨ। ਦਿਲਜੀਤ ਦੋਸਾਂਝ ਨੇ ਵੀ ਪ੍ਰਸ਼ੰਸਕਾਂ ਨੂੰ ਮੈਟਰੋ ਰਾਹੀਂ ਸਫ਼ਰ ਕਰਨ ਦੀ ਅਪੀਲ ਕੀਤੀ ਹੈ।

ਟ੍ਰੈਫਿਕ ਪਾਬੰਦੀਆਂ ਅਤੇ ਪਾਰਕਿੰਗ ਦੀ ਚੇਤਾਵਨੀ

ਦਿੱਲੀ ਟ੍ਰੈਫਿਕ ਪੁਲਿਸ ਅਨੁਸਾਰ, ਅੱਜ ਦੁਪਹਿਰ 1 ਵਜੇ ਤੋਂ ਰਾਤ 12 ਵਜੇ ਤੱਕ ਸਟੇਡੀਅਮ ਦੇ ਆਸ-ਪਾਸ ਦੇ ਰੂਟਾਂ 'ਤੇ ਟ੍ਰੈਫਿਕ ਡਾਇਵਰਸ਼ਨ ਰਹੇਗਾ:

ਪ੍ਰਭਾਵਿਤ ਸੜਕਾਂ: ਲੋਧੀ ਰੋਡ, ਭੀਸ਼ਮ ਪਿਤਾਮਾ ਮਾਰਗ, ਲਾਲਾ ਲਾਜਪਤ ਰਾਏ ਮਾਰਗ, ਆਰਚਬਿਸ਼ਪ ਮਾਰਗ, ਫੋਰਥ ਅਵੇਨਿਊ, ਫਿਫਥ ਅਵੇਨਿਊ ਅਤੇ ਦਿਆਲ ਸਿੰਘ ਕਾਲਜ ਰੋਡ ਸਮੇਤ ਕਈ ਆਸ-ਪਾਸ ਦੀਆਂ ਸੜਕਾਂ 'ਤੇ ਜਾਮ ਦੀ ਸਥਿਤੀ ਬਣ ਸਕਦੀ ਹੈ।

ਪਾਰਕਿੰਗ ਨਹੀਂ ਮਿਲੇਗੀ: ਸਟੇਡੀਅਮ ਦੇ ਬਾਹਰ ਆਮ ਜਨਤਾ ਲਈ ਪਾਰਕਿੰਗ ਦੀ ਕੋਈ ਸਹੂਲਤ ਨਹੀਂ ਹੋਵੇਗੀ। ਨਿੱਜੀ ਵਾਹਨਾਂ ਦੀ ਬਜਾਏ ਜਨਤਕ ਆਵਾਜਾਈ ਦੀ ਵਰਤੋਂ ਕਰੋ। ਟੈਕਸੀ ਜਾਂ ਆਟੋ ਵਾਲਿਆਂ ਨੂੰ ਵੀ ਸਿਰਫ਼ ਨਿਰਧਾਰਿਤ ਪਿਕ-ਅੱਪ ਅਤੇ ਡ੍ਰੌਪ-ਆਫ ਪੁਆਇੰਟਾਂ 'ਤੇ ਹੀ ਰੁਕਣ ਦੀ ਇਜਾਜ਼ਤ ਹੋਵੇਗੀ।