ਤਾਜਾ ਖਬਰਾਂ
ਉੱਤਰੀ ਇੰਗਲੈਂਡ ਦੇ ਲੀਡਜ਼ ਸ਼ਹਿਰ ਵਿੱਚ ਸੜਕੀ ਨਿਯਮਾਂ ਦੀਆਂ ਧੱਜੀਆਂ ਉਡਾ ਕੇ ਖ਼ਤਰਨਾਕ ਕਾਰ ਰੇਸ ਲਗਾਉਣਾ ਦੋ ਪਰਿਵਾਰਾਂ ਲਈ ਕਦੇ ਨਾ ਪੂਰਾ ਹੋਣ ਵਾਲਾ ਘਾਟਾ ਬਣ ਗਿਆ। ਸਕੂਲ ਜਾ ਰਹੀ 27 ਸਾਲਾ ਮਾਂ ਜਸਟੀਨਾ ਹੁਲਬੋਜ ਅਤੇ ਉਸ ਦੀ 4 ਸਾਲਾ ਮਾਸੂਮ ਧੀ ਲੀਨਾ ਜ਼ੈਪਕਜ਼ੋਰ ਦੀ ਦਰਦਨਾਕ ਮੌਤ ਦੇ ਮਾਮਲੇ ਵਿੱਚ ਅਦਾਲਤ ਨੇ ਸਖ਼ਤ ਰੁੱਖ ਅਖ਼ਤਿਆਰ ਕੀਤਾ ਹੈ। ਅਦਾਲਤ ਨੇ ਦੋਸ਼ੀ ਪਾਏ ਗਏ ਦੋ ਭਾਰਤੀ ਮੂਲ ਦੇ ਵਿਅਕਤੀਆਂ—ਜਸਕਮਲ ਰਿਆਤ (37) ਅਤੇ ਹਰਦੀਪ ਭੱਚੂ (29)—ਨੂੰ ਕੁੱਲ 28 ਸਾਲ ਦੀ ਜੇਲ੍ਹ ਦੀ ਸਜ਼ਾ ਸੁਣਾਈ ਹੈ।
ਜਨਵਰੀ 2023 ਵਿੱਚ ਸਕਾਟ ਹਾਲ ਰੋਡ 'ਤੇ ਵਾਪਰੇ ਇਸ ਦਰਦਨਾਕ ਹਾਦਸੇ ਵਿੱਚ ਆਪਣੀ ਔਡੀ ਟੀਟੀ ਆਰਐਸ (Audi TT RS) ਕਾਰ ਤੋਂ ਕੰਟਰੋਲ ਗੁਆਉਣ ਵਾਲੇ ਹਰਦੀਪ ਭੱਚੂ ਨੇ ਜੂਨ 2024 ਵਿੱਚ ਖ਼ਤਰਨਾਕ ਡ੍ਰਾਈਵਿੰਗ ਨਾਲ ਮੌਤ ਦਾ ਕਾਰਨ ਬਣਨ ਦਾ ਦੋਸ਼ ਕਬੂਲ ਕਰ ਲਿਆ ਸੀ, ਜਿਸ ਤੋਂ ਬਾਅਦ ਉਸ ਨੂੰ 12 ਸਾਲ ਦੀ ਕੈਦ ਸੁਣਾਈ ਗਈ।
ਦੂਜੇ ਪਾਸੇ, ਬੀਐਮਡਬਲਿਊ (BMW M135i) ਚਲਾ ਰਹੇ ਕਾਰ ਸੇਲਜ਼ਮੈਨ ਜਸਕਮਲ ਰਿਆਤ ਨੇ ਆਪਣੇ 'ਤੇ ਲੱਗੇ ਦੋਸ਼ਾਂ ਤੋਂ ਇਨਕਾਰ ਕੀਤਾ ਸੀ। ਪਰ ਜਿਊਰੀ ਨੇ ਸੀਸੀਟੀਵੀ (CCTV) ਅਤੇ ਹੋਰ ਸਬੂਤਾਂ ਦੇ ਆਧਾਰ 'ਤੇ ਉਸ ਨੂੰ ਵੀ ਬਰਾਬਰ ਦਾ ਦੋਸ਼ੀ ਪਾਇਆ ਅਤੇ 16 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ। ਜੇਲ੍ਹ ਦੀ ਸਜ਼ਾ ਤੋਂ ਇਲਾਵਾ, ਦੋਵਾਂ 'ਤੇ 6 ਸਾਲ ਲਈ ਡ੍ਰਾਈਵਿੰਗ ਕਰਨ 'ਤੇ ਪਾਬੰਦੀ ਲਗਾਈ ਗਈ ਹੈ ਅਤੇ ਭਵਿੱਖ ਵਿੱਚ ਦੁਬਾਰਾ ਲਾਇਸੈਂਸ ਲੈਣ ਲਈ ਉਨ੍ਹਾਂ ਨੂੰ ਸਖ਼ਤ ਡ੍ਰਾਈਵਿੰਗ ਟੈਸਟ ਪਾਸ ਕਰਨਾ ਪਵੇਗਾ।
ਅਦਾਲਤੀ ਕਾਰਵਾਈ ਦੌਰਾਨ ਸਾਹਮਣੇ ਆਏ ਤੱਥਾਂ ਅਨੁਸਾਰ, ਦੋਵੇਂ ਦੋਸ਼ੀ ਹਾਦਸੇ ਤੋਂ ਪਹਿਲਾਂ ਇੱਕ-ਦੂਜੇ ਨੂੰ ਬਿਲਕੁਲ ਨਹੀਂ ਜਾਣਦੇ ਸਨ। ਰੈੱਡ ਲਾਈਟ (ਟ੍ਰੈਫਿਕ ਸਿਗਨਲ) 'ਤੇ ਕਾਰਾਂ ਨਾਲ-ਨਾਲ ਰੋਕਣ ਦੌਰਾਨ ਦੋਹਾਂ ਨੇ ਸ਼ੀਸ਼ੇ ਹੇਠਾਂ ਕਰਕੇ ਆਪਣੀਆਂ ਸਪੋਰਟਸ ਕਾਰਾਂ ਦੀ ਤਾਕਤ ਬਾਰੇ ਗੱਲਬਾਤ ਕੀਤੀ।
ਡੈਸ਼ਕੈਮ ਅਤੇ ਮੋਬਾਈਲ ਰਿਕਾਰਡਿੰਗ ਤੋਂ ਖੁਲਾਸਾ ਹੋਇਆ ਕਿ ਰਿਆਤ ਦੇ ਉਕਸਾਉਣ ਤੋਂ ਬਾਅਦ ਇਹ ਖੂਨੀ ਰੇਸ ਸ਼ੁਰੂ ਹੋਈ। 40 ਮੀਲ ਪ੍ਰਤੀ ਘੰਟਾ ਦੀ ਸਪੀਡ ਲਿਮਿਟ ਵਾਲੀ ਸੜਕ 'ਤੇ ਭੱਚੂ ਆਪਣੀ ਕਾਰ ਨੂੰ ਲਗਭਗ 90 ਮੀਲ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਭਜਾ ਰਿਹਾ ਸੀ। ਤੇਜ਼ ਰਫ਼ਤਾਰ ਕਾਰਨ ਵਾਹਨ ਕਰਬ (ਕਿਨਾਰੇ) ਨਾਲ ਜਾ ਟਕਰਾਇਆ ਅਤੇ ਬੇਕਾਬੂ ਹੋ ਕੇ ਇੱਕ ਜੈਗੁਆਰ ਡੀਲਰਸ਼ਿਪ ਨੇੜੇ ਫੁੱਟਪਾਥ 'ਤੇ ਚੜ੍ਹ ਗਿਆ, ਜਿੱਥੇ ਪੈਦਲ ਜਾ ਰਹੀ ਮਾਂ-ਧੀ ਇਸ ਦੀ ਲਪੇਟ ਵਿੱਚ ਆ ਗਈਆਂ। ਦੋਹਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ।
ਮਾਮਲੇ ਦੀ ਸੁਣਵਾਈ ਕਰਦਿਆਂ ਜੱਜ ਰੇਅ ਸਿੰਘ ਨੇ ਸਪੱਸ਼ਟ ਸ਼ਬਦਾਂ ਵਿੱਚ ਚੇਤਾਵਨੀ ਦਿੱਤੀ ਕਿ ਆਮ ਜਨਤਕ ਸੜਕਾਂ ਨੂੰ ਰੇਸਿੰਗ ਟਰੈਕ ਵਜੋਂ ਵਰਤਣ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾ ਸਕਦੀ।
ਜੱਜ ਰੇਅ ਸਿੰਘ ਨੇ ਟਿੱਪਣੀ ਕਰਦਿਆਂ ਕਿਹਾ "ਸ਼ਕਤੀਸ਼ਾਲੀ ਗੱਡੀਆਂ ਦੀ ਵਰਤੋਂ ਸਧਾਰਨ ਸੜਕਾਂ 'ਤੇ ਆਪਣੀ ਸੀਮਾ ਪਰਖਣ ਲਈ ਨਹੀਂ ਹੋਣੀ ਚਾਹੀਦੀ। ਅਜਿਹੀ ਬੇਪਰਵਾਹ ਅਤੇ ਤੇਜ਼ ਰਫ਼ਤਾਰ ਦਾ ਨਤੀਜਾ ਕਿੰਨਾ ਭਿਆਨਕ ਹੋ ਸਕਦਾ ਹੈ, ਇਹ ਮਾਸੂਮ ਮਾਂ-ਧੀ ਦੀਆਂ ਮੌਤਾਂ ਤੋਂ ਸਪੱਸ਼ਟ ਹੈ।"
ਇਸ ਫ਼ੈਸਲੇ ਨੇ ਇੱਕ ਵਾਰ ਫਿਰ ਇਹ ਸਾਬਤ ਕਰ ਦਿੱਤਾ ਹੈ ਕਿ ਸੜਕਾਂ 'ਤੇ ਕੀਤੀ ਗਈ ਛੋਟੀ ਜਿਹੀ ਲਾਪਰਵਾਹੀ ਅਤੇ ਸ਼ੌਂਕ ਕਈ ਜ਼ਿੰਦਗੀਆਂ ਤਬਾਹ ਕਰ ਸਕਦਾ ਹੈ।
Get all latest content delivered to your email a few times a month.
