ਤਾਜਾ ਖਬਰਾਂ
ਇਟਲੀ ਦੀ ਕ੍ਰਿਕਟ ਇਤਿਹਾਸ ਵਿੱਚ ਇਹ ਪਹਿਲੀ ਵਾਰ ਹੈ ਜਦੋਂ ਦੇਸ਼ ਟੀ-20 ਵਿਸ਼ਵ ਕੱਪ ਲਈ ਯੋਗਤਾ ਹਾਸਲ ਕਰ ਰਿਹਾ ਹੈ। ਇਸ ਇਤਿਹਾਸਕ ਉਪਲਬਧੀ ਵਿੱਚ ਇੱਕ ਵੱਡਾ ਨਾਮ ਭਾਰਤੀ ਮੂਲ ਦੇ ਖਿਡਾਰੀ ਜਸਪ੍ਰੀਤ ਸਿੰਘ ਦਾ ਵੀ ਸ਼ਾਮਲ ਹੈ, ਜਿਸਦੀ ਜ਼ਿੰਦਗੀ ਦੀ ਕਹਾਣੀ ਕਿਸੇ ਫ਼ਿਲਮੀ ਕਹਾਣੀ ਤੋਂ ਘੱਟ ਨਹੀਂ।
ਪੰਜਾਬ ਦੇ ਫਗਵਾੜਾ ਸ਼ਹਿਰ ਵਿੱਚ ਜਨਮੇ ਜਸਪ੍ਰੀਤ ਸਿੰਘ ਨੇ ਸਿਰਫ਼ 10 ਸਾਲ ਦੀ ਉਮਰ ਵਿੱਚ ਆਪਣੇ ਮਾਪਿਆਂ ਨਾਲ ਇਟਲੀ ਦੇ ਬਰਗਾਮੋ ਸ਼ਹਿਰ ਦਾ ਰੁਖ ਕੀਤਾ। ਨਵਾਂ ਦੇਸ਼, ਅਜੀਬ ਭਾਸ਼ਾ ਅਤੇ ਅਣਜਾਣ ਸੱਭਿਆਚਾਰ—ਇਹ ਸਭ ਉਸ ਲਈ ਵੱਡੀ ਚੁਣੌਤੀ ਸਨ, ਪਰ ਉਸਨੇ ਕਦੇ ਵੀ ਆਪਣੀ ਮਾਤਭਾਸ਼ਾ ਅਤੇ ਜੱਦੀ ਮਿੱਟੀ ਨਾਲ ਜੁੜਾਵ ਨਹੀਂ ਛੱਡਿਆ।
ਮੀਡੀਆ ਨਾਲ ਗੱਲਬਾਤ ਦੌਰਾਨ ਜਸਪ੍ਰੀਤ ਵੱਲੋਂ ਕਹੇ ਗਏ ਸ਼ਬਦ-“ਆਓ, ਅਸੀਂ ਹਿੰਦੀ ਵਿੱਚ ਗੱਲ ਕਰੀਏ”-ਇਸ ਗੱਲ ਦਾ ਸਬੂਤ ਹਨ ਕਿ ਵਿਦੇਸ਼ ਵਿੱਚ ਲੰਬਾ ਸਮਾਂ ਬਿਤਾਉਣ ਦੇ ਬਾਵਜੂਦ ਉਹ ਆਪਣੀਆਂ ਜੜ੍ਹਾਂ ਨੂੰ ਨਹੀਂ ਭੁੱਲਿਆ।
ਸ਼ੁਰੂਆਤੀ ਦਿਨ ਕਾਫ਼ੀ ਮੁਸ਼ਕਲਾਂ ਭਰੇ ਸਨ। ਉਸਦੇ ਪਿਤਾ ਤੀਰਥ ਸਿੰਘ ਅਤੇ ਮਾਤਾ ਜਸਵੀਰ ਕੌਰ ਨੇ ਇੱਕ ਫੈਕਟਰੀ ਵਿੱਚ ਮਜ਼ਦੂਰੀ ਕਰਕੇ ਪਰਿਵਾਰ ਨੂੰ ਸੰਭਾਲਿਆ। ਜਸਪ੍ਰੀਤ ਨੇ ਵੀ ਪਰਿਵਾਰ ਦੀ ਮਦਦ ਲਈ ਦੋ ਸਾਲਾਂ ਦਾ ਇਲੈਕਟ੍ਰੀਸ਼ੀਅਨ ਕੋਰਸ ਕੀਤਾ ਅਤੇ ਨਾਲ-ਨਾਲ ਕ੍ਰਿਕਟ ਨਾਲ ਆਪਣਾ ਨਾਤਾ ਕਾਇਮ ਰੱਖਿਆ।
ਇਟਲੀ ਵਰਗੇ ਦੇਸ਼ ਵਿੱਚ, ਜਿੱਥੇ ਕ੍ਰਿਕਟ ਨੂੰ ਵੱਡੀ ਪਛਾਣ ਨਹੀਂ ਸੀ ਅਤੇ ਸਹੂਲਤਾਂ ਵੀ ਘੱਟ ਸਨ, ਉਥੇ ਆਪਣਾ ਟੈਲੈਂਟ ਨਿਖਾਰਨਾ ਆਸਾਨ ਨਹੀਂ ਸੀ। ਉਸਨੇ ਬਰਗਾਮੋ ਕ੍ਰਿਕਟ ਕਲੱਬ ਨਾਲ ਜੁੜ ਕੇ ਅਭਿਆਸ ਸ਼ੁਰੂ ਕੀਤਾ। ਸਥਾਨਕ ਗੁਰਦੁਆਰੇ ਵਿੱਚ ਮਿਲੇ ਭਾਰਤੀ ਪ੍ਰਵਾਸੀਆਂ ਦੀ ਸਹਾਇਤਾ ਨਾਲ ਉਸਨੇ ਆਪਣੀ ਖੇਡ ਨੂੰ ਹੋਰ ਮਜ਼ਬੂਤ ਕੀਤਾ।
ਇਸ ਲਗਾਤਾਰ ਮਿਹਨਤ, ਸਬਰ ਅਤੇ ਸਮਰਪਣ ਦਾ ਨਤੀਜਾ ਅੱਜ ਸਭ ਦੇ ਸਾਹਮਣੇ ਹੈ—ਜਸਪ੍ਰੀਤ ਸਿੰਘ ਨਾ ਸਿਰਫ਼ ਇਟਲੀ ਦੀ ਰਾਸ਼ਟਰੀ ਕ੍ਰਿਕਟ ਟੀਮ ਦਾ ਹਿੱਸਾ ਹੈ, ਸਗੋਂ ਟੀ-20 ਵਿਸ਼ਵ ਕੱਪ ਵਿੱਚ ਦੇਸ਼ ਦੀ ਨੁਮਾਇੰਦਗੀ ਕਰਨ ਵਾਲਾ ਭਾਰਤੀ ਮੂਲ ਦਾ ਖਿਡਾਰੀ ਵੀ ਬਣ ਚੁੱਕਾ ਹੈ।
ਇਹ ਕਹਾਣੀ ਸਿਰਫ਼ ਕ੍ਰਿਕਟ ਦੀ ਨਹੀਂ, ਬਲਕਿ ਇੱਕ ਪਰਵਾਸੀ ਪਰਿਵਾਰ ਦੇ ਸੁਪਨਿਆਂ, ਸੰਘਰਸ਼ ਅਤੇ ਕਦੇ ਨਾ ਹਾਰ ਮੰਨਣ ਵਾਲੀ ਸੋਚ ਦੀ ਵੀ ਹੈ।
Get all latest content delivered to your email a few times a month.
