ਦੇਸ਼ ਦਾ ਸਭ ਤੋਂ ਮਹਿੰਗਾ ਘਰ ਖ਼ਰੀਦਣ ਵਾਲੇ ਮਾਨਵ ਸਰਦਾਨਾ ਕੌਣ ਹਨ? ਗੁਰੂਗ੍ਰਾਮ 'ਚ ਕੀਤਾ ₹271 ਕਰੋੜ ਦਾ ਵੱਡਾ ਧਮਾਕਾ

ਦਿੱਲੀ-ਐੱਨ.ਸੀ.ਆਰ. ਦੇ ਰੀਅਲ ਅਸਟੇਟ ਬਾਜ਼ਾਰ ਵਿੱਚ ਇੱਕ ਵਾਰ ਫਿਰ ਵੱਡੀ ਹਲਚਲ ਦੇਖਣ ਨੂੰ ਮਿਲੀ ਹੈ। ਦੇਸ਼ ਦੇ ਸਭ ਤੋਂ ਮਹਿੰਗੇ ਰਿਹਾਇਸ਼ੀ ਸੌਦਿਆਂ ਵਿੱਚੋਂ ਇੱਕ ਵਜੋਂ, ਜਾਣੇ-ਪਛਾਣੇ ਉੱਦਮੀ ਮਾਨਵ ਸਰਦਾਨਾ ਨੇ ਗੁਰੂਗ੍ਰਾਮ ਦੇ ਸੈਕਟਰ-54, ਗੋਲਫ਼ ਕੋਰਸ ਰੋਡ 'ਤੇ ਸਥਿਤ DLF ਦੇ ਸੁਪਰ-ਲਗਜ਼ਰੀ ਪ੍ਰੋਜੈਕਟ 'ਦ ਡਾਹਲੀਆਸ' ਵਿੱਚ ਲਗਭਗ 271 ਕਰੋੜ ਰੁਪਏ ਦਾ ਪੈਂਟਹਾਊਸ ਖ਼ਰੀਦ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। ਇਹ ਸੌਦਾ ਸਪੱਸ਼ਟ ਕਰਦਾ ਹੈ ਕਿ ਦੇਸ਼ ਦੇ ਅਮੀਰ ਖ਼ਰੀਦਦਾਰਾਂ ਵਿੱਚ ਹੁਣ ਵੱਡੇ ਅਤੇ ਸੁਪਰ-ਲਗਜ਼ਰੀ ਪੈਂਟਹਾਊਸਾਂ ਦੀ ਮੰਗ ਬਹੁਤ ਤੇਜ਼ੀ ਨਾਲ ਵਧ ਰਹੀ ਹੈ।

ਇਸ ਸੁਪਰ-ਲਗਜ਼ਰੀ ਪੈਂਟਹਾਊਸ ਦਾ ਕੁੱਲ ਸੁਪਰ ਏਰੀਆ ਲਗਭਗ 17,200 ਵਰਗ ਫੁੱਟ ਹੈ, ਜਦਕਿ ਇਸ ਦਾ ਕਾਰਪੇਟ ਏਰੀਆ 10,500 ਵਰਗ ਫੁੱਟ ਦੇ ਨਜ਼ਦੀਕ ਹੈ। ਜੇਕਰ ਕੀਮਤ ਦੇ ਹਿਸਾਬ ਨਾਲ ਦੇਖਿਆ ਜਾਵੇ ਤਾਂ ਸੁਪਰ ਏਰੀਆ ਦੇ ਆਧਾਰ 'ਤੇ ਇਹ ਕੀਮਤ ਲਗਭਗ 1.58 ਲੱਖ ਰੁਪਏ ਪ੍ਰਤੀ ਵਰਗ ਫੁੱਟ ਅਤੇ ਕਾਰਪੇਟ ਏਰੀਆ ਦੇ ਆਧਾਰ 'ਤੇ ਲਗਭਗ 2.6 ਲੱਖ ਰੁਪਏ ਪ੍ਰਤੀ ਵਰਗ ਫੁੱਟ ਬਣਦੀ ਹੈ, ਜੋ ਕਿ ਗੁਰੂਗ੍ਰਾਮ 'ਚ ਲਗਜ਼ਰੀ ਘਰਾਂ ਦੀਆਂ ਕੀਮਤਾਂ ਦੇ ਉੱਚੇ ਪੱਧਰ ਨੂੰ ਦਰਸਾਉਂਦੀ ਹੈ।

ਮਾਨਵ ਸਰਦਾਨਾ ਦਿੱਲੀ-ਐੱਨ.ਸੀ.ਆਰ. ਦੇ ਨਾਮੀ ਸਰਦਾਨਾ ਪਰਿਵਾਰ ਨਾਲ ਸਬੰਧ ਰੱਖਦੇ ਹਨ, ਜਿਸ ਦੀ ਕਾਰੋਬਾਰੀ ਵਿਰਾਸਤ 100 ਸਾਲ ਤੋਂ ਵੀ ਵੱਧ ਪੁਰਾਣੀ ਹੈ। ਇਹ ਪਰਿਵਾਰ 'ਇੰਪੀਰੀਅਲ ਆਟੋ ਇੰਡਸਟਰੀਜ਼' ਲਈ ਜਾਣਿਆ ਜਾਂਦਾ ਹੈ, ਜਿਸ ਦੀ ਸਥਾਪਨਾ 1969 ਵਿੱਚ ਮਾਨਵ ਸਰਦਾਨਾ ਦੇ ਪਿਤਾ ਐੱਸ.ਬੀ. ਸਰਦਾਨਾ ਅਤੇ ਜਗਜੀਤ ਸਿੰਘ ਨੇ ਕੀਤੀ ਸੀ। ਫਰੀਦਾਬਾਦ ਸਥਿਤ ਇਹ ਕੰਪਨੀ ਆਟੋਮੋਬਾਈਲ ਸੈਕਟਰ ਲਈ ਪਾਰਟਸ ਤਿਆਰ ਕਰਦੀ ਹੈ। ਬਾਅਦ ਵਿੱਚ ਗਲੋਬਲ ਪ੍ਰਾਈਵੇਟ ਇਕੁਇਟੀ ਫਰਮ 'ਵਾਰਬਰਗ ਪਿੰਕਸ' ਨੇ ਇਸ ਵਿੱਚ ਵੱਡੀ ਹਿੱਸੇਦਾਰੀ ਹਾਸਲ ਕਰ ਲਈ ਸੀ। ਸਰਕਾਰੀ ਰਿਕਾਰਡਾਂ ਮੁਤਾਬਕ ਮਾਨਵ ਸਰਦਾਨਾ ਮੌਜੂਦਾ ਸਮੇਂ ਇੰਪੀਰੀਅਲ ਆਟੋ ਗਰੁੱਪ ਨਾਲ ਜੁੜੀਆਂ ਇੱਕ ਦਰਜਨ ਤੋਂ ਵੱਧ ਕੰਪਨੀਆਂ ਵਿੱਚ ਡਾਇਰੈਕਟਰ ਵਜੋਂ ਕੰਮ ਕਰ ਰਹੇ ਹਨ।

ਅਕਤੂਬਰ 2024 ਵਿੱਚ ਲਾਂਚ ਕੀਤਾ ਗਿਆ 'ਦ ਡਾਹਲੀਆਸ' ਪ੍ਰੋਜੈਕਟ DLF ਫੇਜ਼-5 ਵਿੱਚ ਲਗਭਗ 17 ਏਕੜ 'ਚ ਫੈਲਿਆ ਹੋਇਆ ਹੈ। ਇਸ ਵਿੱਚ 420 ਦੇ ਲਗਭਗ ਅਪਾਰਟਮੈਂਟ ਅਤੇ ਪੈਂਟਹਾਊਸ ਹਨ, ਜਿਨ੍ਹਾਂ ਦੀਆਂ ਕੀਮਤਾਂ 100 ਕਰੋੜ ਰੁਪਏ ਤੋਂ 170 ਕਰੋੜ ਰੁਪਏ ਤੱਕ ਹਨ। DLF ਨੂੰ ਇਸ ਪ੍ਰੋਜੈਕਟ ਤੋਂ 40,000 ਕਰੋੜ ਰੁਪਏ ਤੋਂ ਵੱਧ ਦੀ ਆਮਦਨ ਦੀ ਉਮੀਦ ਹੈ ਅਤੇ 65 ਫ਼ੀਸਦੀ ਤੋਂ ਵੱਧ ਯੂਨਿਟ ਪਹਿਲਾਂ ਹੀ ਵਿਕ ਚੁੱਕੇ ਹਨ। ਇਸ ਤੋਂ ਪਹਿਲਾਂ DLF ਦੇ 'ਦਿ ਕੈਮੇਲੀਆਸ' ਨੇ ਵੀ ਗੋਲਫ਼ ਕੋਰਸ ਰੋਡ ਨੂੰ ਦੇਸ਼ ਦੇ ਸਭ ਤੋਂ ਮਹਿੰਗੇ ਰਿਹਾਇਸ਼ੀ ਇਲਾਕਿਆਂ ਵਿੱਚ ਸ਼ਾਮਲ ਕਰਵਾਇਆ ਸੀ।