ਸੋਨੇ-ਚਾਂਦੀ ਦੀਆਂ ਕੀਮਤਾਂ 'ਚ ਜ਼ਬਰਦਸਤ ਉਛਾਲ: MCX 'ਤੇ 1% ਤੋਂ ਵੱਧ ਚੜ੍ਹੇ ਭਾਅ, ਜਾਣੋ ਵਾਧੇ ਦੇ ਵੱਡੇ ਕਾਰਨ

ਅਮਰੀਕੀ ਡਾਲਰ 'ਚ ਆਈ ਗਿਰਾਵਟ ਅਤੇ ਵਿਸ਼ਵ ਬਾਜ਼ਾਰਾਂ 'ਚੋਂ ਮਿਲੇ ਮਜ਼ਬੂਤ ਸੰਕੇਤਾਂ ਕਾਰਨ ਮੰਗਲਵਾਰ ਨੂੰ ਘਰੇਲੂ ਵਾਅਦਾ ਬਾਜ਼ਾਰ (MCX) 'ਚ ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ 'ਚ ਤੇਜ਼ੀ ਦਰਜ ਕੀਤੀ ਗਈ। ਮੰਗਲਵਾਰ ਸਵੇਰ ਦੇ ਕਾਰੋਬਾਰ ਦੌਰਾਨ ਦੋਵਾਂ ਕੀਮਤੀ ਧਾਤਾਂ 'ਚ 1 ਫ਼ੀਸਦੀ ਤੋਂ ਵੱਧ ਦਾ ਵਾਧਾ ਦੇਖਣ ਨੂੰ ਮਿਲਿਆ।

ਸਵੇਰੇ 9:10 ਵਜੇ ਦੇ ਕਰੀਬ MCX 'ਤੇ ਅਕਤੂਬਰ ਡਿਲੀਵਰੀ ਵਾਲਾ ਸੋਨਾ 1.32 ਫ਼ੀਸਦੀ ਚੜ੍ਹ ਕੇ ₹1,55,124 ਪ੍ਰਤੀ 10 ਗ੍ਰਾਮ 'ਤੇ ਪਹੁੰਚ ਗਿਆ। ਦੂਜੇ ਪਾਸੇ, ਸਤੰਬਰ ਡਿਲੀਵਰੀ ਲਈ ਚਾਂਦੀ ਦੇ ਭਾਅ 'ਚ 1.07 ਫ਼ੀਸਦੀ ਦਾ ਉਛਾਲ ਆਇਆ ਅਤੇ ਇਹ ₹2,39,400 ਪ੍ਰਤੀ ਕਿਲੋਗ੍ਰਾਮ 'ਤੇ ਕਾਰੋਬਾਰ ਕਰਦੀ ਦੇਖੀ ਗਈ।

ਕੇਡੀਆ ਕਮੋਡਿਟੀਜ਼ ਦੇ ਮੁਖੀ ਅਜੈ ਕੇਡੀਆ ਅਨੁਸਾਰ, ਵਿਸ਼ਵ ਪੱਧਰ 'ਤੇ ਚੱਲ ਰਹੀ 'ਡੀ-ਡੌਲਰਾਈਜ਼ੇਸ਼ਨ' ਦੀ ਪ੍ਰਕਿਰਿਆ ਕਾਰਨ ਇਸੇ ਸਾਲ ਸੋਨਾ ₹1.70 ਲੱਖ ਤੋਂ ₹1.80 ਲੱਖ ਪ੍ਰਤੀ 10 ਗ੍ਰਾਮ ਤੱਕ ਪਹੁੰਚ ਸਕਦਾ ਹੈ। ਉਨ੍ਹਾਂ ਅਨੁਮਾਨ ਲਗਾਇਆ ਕਿ ਅਗਲੇ ਡੇਢ ਸਾਲ 'ਚ ਇਹ ₹2 ਲੱਖ ਦਾ ਅੰਕੜਾ ਵੀ ਪਾਰ ਕਰ ਸਕਦਾ ਹੈ। ਅੰਤਰਰਾਸ਼ਟਰੀ ਬਾਜ਼ਾਰ 'ਚ ਸੋਨਾ $4,300 ਪ੍ਰਤੀ ਔਂਸ ਤੋਂ ਵਧ ਕੇ $4,600 ਅਤੇ ਲੰਬੇ ਸਮੇਂ 'ਚ $6,000 ਪ੍ਰਤੀ ਔਂਸ ਤੱਕ ਜਾ ਸਕਦਾ ਹੈ।

ਕੀਮਤਾਂ 'ਚ ਉਛਾਲ ਦੇ ਮੁੱਖ ਕਾਰਨ:

ਕਮਜ਼ੋਰ ਡਾਲਰ ਤੇ ਕੱਚਾ ਤੇਲ: ਡਾਲਰ ਇੰਡੈਕਸ 'ਚ ਨਰਮੀ ਕਾਰਨ ਹੋਰ ਮੁਦਰਾਵਾਂ ਵਾਲੇ ਖਰੀਦਦਾਰਾਂ ਲਈ ਸੋਨਾ-ਚਾਂਦੀ ਸਸਤਾ ਹੋਇਆ ਹੈ। ਉੱਥੇ ਹੀ, ਅਮਰੀਕਾ-ਈਰਾਨ ਤਣਾਅ ਅਤੇ ਹੋਰਮੁਜ਼ ਜਲਡਮਰੂ ਬੰਦ ਰਹਿਣ ਦੀਆਂ ਚਿੰਤਾਵਾਂ ਵਿਚਾਲੇ ਕੱਚਾ ਤੇਲ $88 ਪ੍ਰਤੀ ਬੈਰਲ ਦੇ ਆਸ-ਪਾਸ ਬਣਿਆ ਹੋਇਆ ਹੈ।

ਅਮਰੀਕੀ ਆਰਥਿਕ ਅੰਕੜਿਆਂ 'ਤੇ ਨਜ਼ਰ: ਬਾਜ਼ਾਰ ਦੀ ਨਜ਼ਰ ਹੁਣ ਬੁੱਧਵਾਰ ਨੂੰ ਆਉਣ ਵਾਲੇ ਅਮਰੀਕੀ ਸੀ.ਪੀ.ਆਈ. (Consumer Price Index) ਅਤੇ ਵੀਰਵਾਰ ਦੇ ਪੀ.ਪੀ.ਆਈ. (Producer Price Index) ਅੰਕੜਿਆਂ 'ਤੇ ਟਿਕੀ ਹੋਈ ਹੈ, ਜੋ ਫੈਡਰਲ ਰਿਜ਼ਰਵ ਦੀਆਂ ਭਵਿੱਖੀ ਨੀਤੀਆਂ ਦਾ ਰੁੱਖ ਸਪੱਸ਼ਟ ਕਰਨਗੇ।

ਬਾਜ਼ਾਰ ਮਾਹਰ ਰਵੀ ਸਿੰਘ ਅਨੁਸਾਰ ਸੋਨਾ ਫਿਲਹਾਲ ₹1,54,500 ਦੇ ਪ੍ਰਤੀਰੋਧ (Resistance) ਜ਼ੋਨ ਨੂੰ ਪਾਰ ਕਰ ਚੁੱਕਾ ਹੈ। ਜੇਕਰ ਇਹ ਤੇਜ਼ੀ ਬਰਕਰਾਰ ਰਹਿੰਦੀ ਹੈ ਤਾਂ ਅਗਲਾ ਟੀਚਾ ₹1,58,000 ਹੋ ਸਕਦਾ ਹੈ। ਦੂਜੇ ਪਾਸੇ, ਹੇਠਾਂ ਵੱਲ ਸੋਨੇ ਲਈ ₹1,51,000 ਅਤੇ ₹1,47,600 'ਤੇ ਮਜ਼ਬੂਤ ਸਪੋਰਟ (Support) ਪੱਧਰ ਮੌਜੂਦ ਹਨ।